پەیامی سەرەخۆشی مەكتەبی سیاسی، بەبۆنەی شەهیدبوونی بەرپرسی لقی ۱۷ی شەنگال

 

بەداخو پەژارەیەكی زۆرەوە هەواڵی شەهیدبوونی هەڤاڵی تێكۆشەر (وەحید باكۆزی) بەرپرسی لقی حەڤدەی شنگالی پارتیمان رادەگەیەنین، کە دوێنێ لەبەرەكانی رووبەڕووبوونەوەی هێزەكانی عێراق لەپێناو پاراستن و داكۆكیکردن لە خاكی پیرۆزی كوردستان، لە دەڤەری زوممار شەهید بوو.

 

بەو هەواڵە خەمناكەوە بەناوی مەکتەبی سیاسی و ئەنجوومەنی سەرکردایەتی پارتی دیموکراتی کوردستان پرسەو سەرەخۆشی ئاراستەی خۆمان و ئەندامان و لایەنگرانی پارتیمان و پێشمەرگە دلێرەکان و تەواوی گەلی كوردستان دەكەین، هەروەها سەرەخۆشی لە خانەوادەی تێكۆشەری هەڤاڵ (وەحید باكۆزی) و بنەماڵەوكەس و كارو دۆستانی و تەواوی هەڤاڵانی لقی حەڤدە دەكەین. 

 

هەڤاڵ (وەحید باكۆزی) یەكێك بوو لە تێكۆشەرانی رێبازی پارتی و بارزانی و بزووتنەوەی رزگاریخوازیمان بێ سرەوتن و بە گیانی نیشتیمانپەروەری و كوردانەوە خزمەتی دۆزی رەوای گەلەكەمانی كردووە و هەر لەو پێناوەشەدا گیانی بەخشی.  

 

ئێمە وێڕای پرسە و سەرەخۆشیمان بۆ خانەوادەی شەهید و هاوخەمی قووڵمان بۆ لەدەستدانی ئەو قارەمانە، پرسە و سەرەخۆشی ئاراستەی خانەوادە و کەسوکاری ئەو پێشمەرگە شەهیدانەیش دەکەین کە هاوسەنگەری کاکە وەحید بوون لە پاراستنی خاکی کوردستان و گیان کردە قوربانی سەرفرازی گەلەکەیان. هاوکات بەڵێن و وەفا دووپات دەكەینەوە هەمیشە و بەردەوام بین لە بەرگریكردن لە گەل و خاكی كوردستان و درێژەپێدەری ئەو رێگا و رێبازە راستەقینەیە بین لەپێناو پاراستنی دەسكەوتەكانمان و بەدیهێنانی مافە رەواكانی کوردستانیان..

 

جارێكی دیكە پرسەوسەرەخۆشی لەخۆمان و خانەوادە و كەسوكاری شەهید (وەحید باكۆزی) دەكەین و لە خوای گەورە داواكارین سەبوری و  ئارامیی بەهەموو لایەك ببەخشێ و گیانی هەڤاڵی كۆچكردویشمان بەبەهەشتی بەرین شاد بكات..

 

نەمری وسەربەرزی بۆ شەهیدانی كورد و كوردستان...

 

انا لله وانا الیه راجعون

مەكتەبی سیاسی پارتی دیموكراتی كوردستان

 

27/10/2017

 

ژیان نامەی شەهیدی سەرکردە..

 

وەحید ئیبراهیم ساڵح باکۆزی

 

- لە ساڵی ١٩٦٣ لە گوندی باکۆزێی سەر بە ناحیەی زاویتە لە دایک بووە.

 

- لە ساڵی ١٩٨١ پەیوەندی بە شۆڕشی گوڵانی نیشتمانیی پێشکەوتنخواز کردووەو، وەک پێشمەرگە لە رێکخراوی شەهیدانی گەڤەرکێی سەربە لیژنەی ناوچەی دهۆک ئه‌ركی بینیوه‌. لەبەر لێهاتوویی و دڵسۆزی دەکرێتە ئامیر مەفرەزە. 

 

- لە ساڵی ١٩٨٦گواستراوەتەوە بۆ رێکخراوی (دەشتی سیمێل)ی سەربە لیژنه‌ی ناوچەی دهۆک.

 

- لە ساڵی ١٩٨٧ دەبێتە جێگری رێکخراوی کۆماتەی سەربە هه‌مان لیژنه‌ ناوچە.

 

- لەساڵی ١٩٨٨ لە کاتی ئەنفالەکان ئاوارەی تورکیا دەبێت پاشان دەچێتە ئێران.

 

- لە ساڵی  ١٩٩١ لە کاتی راپەرینە مەزنەکەی کوردستان رۆڵێکی کاریگەری هەبووه‌ و دەبێتە ئەندامی لیژنەی ئەمنی لە شاری دهۆک.

 

- لە ساڵی ١٩٩٢ ده‌بێته‌ ئه‌ندامی لیژنه‌ی ناوچه‌ی سێمێل.

 

- لە ساڵی ١٩٩٣ دەبێتە ئەندامی لیژنەی ناوچەی دهۆک.

 

- لە ساڵی ١٩٩٤ دەگوازرێتەوە بۆ لقی٩ی ئاکرێ بەپلەی ئەندامی لق و بەرپرسی سەربازیی لق.

 

- لە ساڵی ١٩٩٦ دەکرێتە بەرپرسی لیژنه‌ی ناوچەی برایەتی له‌ زاویته‌.

 

- ساڵی ٢٠٠١ دەگوازرێتەوە بۆ ئەرکی سەربازی، دەکرێتە بەرپرسی سوپای١٤ لە زاخۆ كه‌ سه‌ر به‌ سەربە فەرماندەیی دهۆکه‌.

 

- ساڵی ٢٠٠٤ دەگوازرێتەوە بۆ  سوپای ٢ سکرینێ سەر بە فەرماندەیی دهۆک وەکو بەرپرسی سوپا.

 

- ساڵی ٢٠٠٦ دەگوازرێتەوە بۆ فەرماندەیی سەفین وەکو فەرماندەی فەرماندەیی سەفین.

 

- ساڵی ٢٠١٥ دەگوازرێتەوە بۆ کاری حزبایەتی و بەرپرسیارێتیی لق ١٧ی شنگال وەر دەگرێت.

 

- لە رۆژی ٢٦/١٠/٢٠١٧ لە میحوەری زوممار لە کاتی بەرگری لە گەل و خاکی نیشتیمان  لەگەڵ پۆلێک پێشمەرگە شەهید دەبن.