جڤات و پارێزگەها دهۆکێ پشته‌ڤانیا خو بو که‌رکوکێ دیار كر
دهوک-KDP.info- جڤات و پارێزگەها دهۆکێ بەیاننامەکێ ئاراستەیى جیهانێ دکەن و تێدا راگەهاندى یە، ب هه‌مى شیانێن خو پشته‌ڤانێن حکومه‌تا هه‌رێما کوردستانێ و هێزێن پێشمه‌رگه‌یى و سه‌رکردایه‌تییا کوردستانێ نه و ب هه‌مى هێز و شیانێن خو دێ به‌ره‌ڤانیێ ژ ئاخا کوردستانێ که‌ین، هه‌روه‌سا پشته‌ڤانییا پارێزگارێ شه‌رعیێ که‌رکوکێ و سه‌رۆکێ جڤاتا پارێزگه‌ها که‌رکوکێ دکەین، و بکارئینانا جه‌کێ ئه‌مریکى دژى کوردستانێ و بێ ده‌نگ وێ شەرمزار دکەین.
ئیدارا پارێزگەها دهۆکێ دگەل جڤاتا پارێزگەهێ روونشتنەک لسەر بارودوخێ نوکە یێ هەرێما کوردستان ئەنجامدا، (شەمال میرو)، ئەندامێ جڤاتا پارێزگەها دهوکێ، بۆ مالپەرێ فەرمیێ پارتى دیموکراتى کوردستان گۆت:" نیزیکى دەه خالێن کرنگ د بەیاننامەکێدا لسەر بارودۆخێ نوکە یێ هەرێما کوردستانێ هاتنە بەحسکرن، کۆ ئەم لسەر چەند خالەکان رێکەفتین و دێ دەنگدان لسەر ئێتەکرن، دێ سوباهى بریار لسەر وان خالێن رێکەفتى ئێتەدان".
(فەرهاد ئەتروشى)، پارێزگارێ دهۆکێ دپرێس کونفرانسەکى دا گۆت:" ژبەر کاودانێن هەرێما کوردستانێ تێدا دەرباز دبیت و ئەو زورداریا ل وەلاتیێن کوردستانێ ل دەڤەرێن جودا جودا ژلایێ حەشدا شەعبى و لشکەرێ عیراقێ یێ شیعە مەزهەب و ب پێشتەڤانیا پاسدارێن ئیرانى ب جەکێ ئەمریکى ڤە دهێتەکرن، کو گیان و ملکێ خەلکى دکەفیتە بەر هەرەشەیا تێکدانێ، ئەڤ چەندە دژى هەمى بەندێن مافى مرۆڤى یە، ژبەر هندێ ب هه‌مى شیانێن خو پشته‌ڤانێن حکومه‌تا هه‌رێما کوردستانێ و هێزێن پێشمه‌رگه‌یى و سه‌رکردایه‌تییا کوردستانێ نه و ب هه‌مى هێز و شیانێن خوه دێ به‌ره‌ڤانیێ ژئاخا کوردستانێ که‌ین، هه‌روه‌سا پشته‌ڤانییا پارێزگارێ شه‌رعیێ که‌رکوکێ و سه‌رۆکێ جڤاتا پارێزگه‌ها که‌رکوکێ دکەین".
(فەرهاد ئەتروشى)، خویا کر:"د شه‌ڕێ دژى تیرۆرستێن داعشێدا هێزێن پێشمه‌رگه‌ى ب هزاران شه‌هید و بریندار دان، لوى ده‌مى ئه‌مریکا پشته‌ڤان بوو، لێ نوکە و ل ده‌مێ هێرشێن حه‌شدا شه‌عبى کو ب جه‌کێ ئه‌مریکى لسه‌ر کوردستانێ دهێنه کرن، ئه‌مریکا بێ ده‌نگ بوویە و ئه‌ڤه ژى جهێ شەرمزاریێ یه".
ئیدارا پارێزگەها دهۆکێ چەندین خال دانانە بەر دەستێ جڤاتا پارێزگەها دهۆکێ، کۆ نوونەرێ راستەقینە یێ خەلکێ دهۆکێ یە، ئەو ژى ئەڤ خالەنە:-
1- ب توندى کریارێن میلیشیاتێن حەشدا شەعبى و پاسدارێن ئیرانى و لەشکەرێ عیراقێ شەرمزار دکەین، کۆ رەفتارەکا دوورى مرۆڤایەتیێ دگەل مللەتێ مەدا کرى، ئەڤە سەرپێجیە بۆ دستورێ عیراقێ و دەست تێوەردانەکا ئاشکەرایە لسەر بەندێ (9) برگا (ا) یێ دستورێ عیراقێ، کۆ نابیت لشکەرێ عیراقێ ببیتە ئامرازەک چەوساندنا گەلێ عیراقێ و نابیت بۆ مەرەمێن سیاسى بهێتە بکار ئینانى، برگا (ب) دهەمان بەندا، نابیت هیچ هێزەک وەک میلیشیات ژ دەرڤەیى لشکەرێ عیراقێ هەبیت و یا دیارە حەشدا شەعبى ژ پێکهاتەیێن میلیشیاتێن شیعى یە.
2- پێشتەڤانیا حکومەتا هەرێما کوردستانێ دکەین، پێدڤییە حکومەتا هەرێما کوردستانێ بتنێ نوونەراتیا خەلکێ کوردستانێ بکەت، نەک چ کەس و لایەنێن دیتر، دیسان داخوازیا ئێکرێزیا مللەت و سەرکردایەتیا مللەتێ کورد دکەین.
3- پێشتەڤانیەکا بێ سنۆر ل گشت پێشمەرگە و فەرماندەیێن گشتى یێن پێشمەرگەیى و سەرکردایەتیا کوردستانێ دکەین.
4- ب هەمى هێز و شیانێن خۆ دێ بەرەڤانیێ ژ ئاخ و دەسکەفتێن کوردستانێ کەین، یێن ب خوینا کورێن مللەتێ کورد ب دەستڤە هاتین، سەرکەفتن دێ هەر بۆ کوردستانێ بیت، جونکى لسەر رێبازا راست و دروست دجین، بلا خەلکێ مە دلنیا بیت، کۆ مزگینیێن باش و خۆش پرێڤەنە و بلا لسەر هێشێن خۆ بن و باوەریێ ب پرۆپاکەندە و گوتگوتکێن نەحەزێن کوردستانێ نەبیت، جونکى جوکرافى و دیرۆک د سەلمینن، ئەڤ ئاخ و وارە یێ کوردایە و دێ بەرەڤانیێ ژێ کەین، نە ستەمێ لسەر کەسێ دکەین و نە ژى ژکەسێ قەبیل دکەین.
5- پێشتەڤانیا پارێزگارێ شەرعیێ کەرکوکێ (د. نەجمەدین کەریم) دکەین، هەروەسا ئەنجوومەنێ شەرعى یێ کەرکوک و سەرۆکێ وێ (ریبوار تەلەبانى) دکەین.
6- شەرمزارکرنا هەلویستێ ئەمریکا و ولاتێن ئەم ب هەڤپەیمانێن خۆ دهژمارتین، دەمێ مە شەرێ تیرۆرستێن داعشێ دکر، کۆ درندەترین رێکخراوا تیرورستى بوو ل جیهانێ و مە ب هزاران شەهید دان، زێدەبارى دەربەدەرى و ئاوارەبوون و ستەما ل مللەتێ مە هاتیەکرن ب تایبەت ئەڤرۆ میلیشیاتێن حەشدا شەعبى ب جەکێ ئەمریکى یێ پێشمەرگەیێ کوردستانێ شەهید دکەن و دەبابەیێن وان لسەر کەلەخێن واندا یێ دجن، ئەڤە کێماسى و شەرمزاریەکا مەزنە بۆ ئەمریکا و جکومەتا وان.
7- بێ هەلویستى و بێ دەنگیا وەلاتێن ئورۆپى یێن ب ناڤێ مافى مرۆڤ و دیموکراسیەتێ گازى دکەن ب سەیر و حێبەتى دبینین، داخوازێ دکەین هەلویستێ خۆیێ پێشتەڤانیێ دیار بکەن.
8- هەر ژ رۆژا ئێکێ یا هێزێن میلیشیاتێن حەشدا شەعبى جووینە د کەرکوکێدا ل کونگرێ رۆژنامەڤانى و لبەر چاڤێن میدیایێ برەنگەکێ ئێکسەر قەدەغەکرنا زمانێ کوردى هاتەکرن، دەمێ نەهێلایى بەرپرسەکێ ئەمنى ب زمانێ کوردى ب ئاخڤیت، ئەڤە ژى سەرپێجیەکا دستورى یە لگۆر بەندێ (4).
9- ب هیچ رەنگەکى رازى نابین ب راستەوخۆ هەڤکارى و سەرەدەرەیێ دگەل حکومەتا بەغدا بکەین، جونکى دبیتە ئەگەرێ هەلوەشاندنا عیراقێ و فیدرالیەتێ و دستورێ عیراقێ، دخوازین (د. فوئاد مەعسوم) دەست ژ کارێ خۆ ڤەکێشیت و ب هیچ رەنگەکى پێشتەڤانیا ڤان جورە پێنگاڤا نەکەت، جونکى دژى هەمى پرنسیپێن دستورێ عیراقێ نە، ئەو ژیانا پێشمەرگایەتیا وى کرى دماوەیێ سالێن بوریدا لبیرا وى بیت.
10- داخوازێ دکەین تاوانبارێن میلیشیاتێن حەشدا شەعبى و پاسدارێن ئیرانى و فەیلەقا قودس، وەکو تاوانبارێن جەنگى بهێنە دادگەهکرن، ژبەر وان کریارێن ل کەرکوک و دەڤەرێن دیتر ئەنجامداین، هەروەسا دخوازین و پێدڤییە نەتەوەیێن ئێکگرتى ژبێ دەنگى و ژ بێ هەلویستیا خۆ دەربکەفن، جونکى ئەڤە ناگونجیت دگەل بەلگەنامەیێن وان، کۆ سەروەریا وەلاتان و پاراستنا ئاسایش و ئارامیا جیهانێ ئەرک و رۆلێ نەتەوەیێن ئێکگرتى یە.
11- ئەڤ بەیاننامە دهێتە ئاراستەکرن بۆ رایا گشتى و دەزگەهێن میدیایى و هەمى لایەنێن پەیوەندیدار ب رەوشا ئەڤرۆ.
هەلز عەلى سەلیم
