کۆنگرێسمانێکی ئەمریکایی داوا دەکات پێشمەرگە پارێزگاری لە پێکهاتە ئایینییەکان بکات

جێف فرۆنتبێری، نوێنەری ویلایەتی نبراسکای ئەمریکا، داوا دەکات ناوچەیەکی ئارام لە عێراقدا دروست بکرێت بۆ پارێزگاری لە پێکهاتەکان بە تایبەتی بۆ دیان (مەسیحی) و كوردانیی ئێزدی و حکوومەتی ھەرێمی کوردستان و هێزی پێشمەرگە بەڕێوەی ببەن.

فرۆنتبێری کە ئەندازیاری بڕیاری کۆنگریسی ئەمریکایە بۆ بەجینۆسایدناساندنی تاوانەکانی داعش لە عێراق و سووریا دژ بە ئێزدی و دیان و پێکهاتەکانی دیکە، لە وەڵامی پرسیارێکی دەنگی ئەمریکادا، بە ئاشکرا داوای کرد ناوچەیەکی ئارام بە شێوەیەک مەرجی تایبەتی ھەبێت لە عێراقدا دابمەزرێت و بە تایبەتی لە دەشتی نەینەوا کە حکوومەتی ھەرێمی کوردستان و پێشمەرگە بەڕێوەی ببەن؛ دەکرێت بە شێوەیەک حکوومەتی ناوەندیی بەغداش پەیوەندیی پێوە ھەبێت.

ئەو کۆنگرێسمانە مەترسیی خۆی نەشاردەوە کە لە ئەنجامی کردەوەی دڕندانەی توندڕەوەکان و داعش، پێکهاتە ئایینی و نەتەوەییەکان کە ئەو ناوچانەیان دروست کردووە، شوێنی خۆیان بەجێ بهێڵن و پێکهاتەی دانیشتووان لەو شوێنانە بگۆڕدرێت. بۆیە نوێنەرەکەی ویلایەتی نبراسکا لە کۆنگرێسی ئەمریکا داوا دەکات بەھەموو شێوەیەک ھەوڵ بدرێت داکۆکی لە پێکهاتەی دیموگرافی ڕۆژھەڵاتی ناوەڕاست بکرێت و پێکهاتە جیاجیاکان بە ئارامی و ئاسایش لە شوێنی خۆیاندا بژین.