"نەخشە و پلانەكانی سەرۆك بارزانی، داعشی شكاند"

هەولێر-KDP.info- ئەندامێكی كۆمیتەی ناوەندیی حزبی دیموكراتی كوردستانی ئێران دەڵێ: "سەركەوتنی پێشمەرگە لە ئامانجێكی نەتەوەیی گرینگ نزیكمان دەكاتەوە، ئەویش بەدیهێنانی ئاواتەكانی گەلی كوردستانە بۆ سەربەخۆیی".

(كاوە بارامی)، بە ماڵپەڕی فەرمیی پارتی دیموكراتی كوردستانی ڕاگەیاند: " قارەمانێتیی پێشمەرگە لە بەرانبەر داعشدا بە ڕوونی دیارە و نەك تەنیا توانیویەتی تێكیان بشكێنێت، بەڵكو وەها پاشەكشەی پێ كردوونە، چیدی ناتوانن وەك جاران پەلاماری شارەكانی كوردستان بدەن؛ دیارە هەر هێرش و پلانێكی سەربازی، سەركردایەتییەكی بەهێزی دەوێت، بۆیە ئەو سەركەوتن و نەخشە و پلانانەیش سەركردەیەكی بەهێزی وەك (سەرۆك بارزانی)ـیان لە پشتە كە ڕاستەوخۆ سەرپەرشتیی هێزی پێشمەرگە دەكات لە باشووری كوردستان، ئەگەرنا هێزێكی وەك داعش وڵاتانێكی وەك سووریا و عێراق و چەند وڵاتێكی دیكەیش وەها گیریان خواردووە بە دەستیەوە، خاكیشیان لێ داگیر كراوە؛ بەڵام هەر ئەو داعشە نەیتوانی لە كوردستان بمێنێتەوە، ئەوەش نیشانەی بوونی سەركردایەتییەكی باشە."

(بارامی) دەیشڵێت: "بوونەدەوڵەت و سەربەخۆییی كوردستان مافی هەموو تاكێكی كوردستانە؛ جا تا پێشمەرگە زیاتر سەر بكەوێت، لە ئامانجی خۆمان نزیكتر دەبینەوە؛ كورد ناشێ لەوە زیاتر ژێردەستە بژیت و، دەبێ بڕیار لە چارەنووسی خۆی بدات".