سەرۆک بارزانی ساڵیادی ده‌رچوونی رۆژنامه‌ی "خه‌بات"ی پیرۆز کرد

هەولێر-KDP.info-  (سەرۆک بارزانی) لە پەیامیکدا بۆ بۆنەی 56 ساڵەی دامەزراندنی رۆژنامەی خەباته‌وه‌ رایگەیاند کە، رۆژنامه‌ی "خه‌بات" وەکچۆن هەمیشە بە گیانێکی پێشمەرگانەوە داكۆكیكارێكی مافه‌ ره‌واكانی گه‌لەکەمان بووه‌ و رۆڵی به‌رچاویشی له‌ بڵاوكردنه‌وه‌ی هوشیاریی نه‌ته‌وه‌یی و بنیادنانه‌وه‌ی مرۆڤی كورددا بینیوە، لەم قۆناخەشدا ئەرکی خۆی لە برەودانی گیانی بەرگری و نیشتیمانپەروەری بەباشی بینیوە و وەک کەناڵێکی ڕاگەیاندن بەرپرسیارانە و دڵسۆزانە کاری کردووە.

 

 

دەقی پەیامی پیرۆزبایی سەرۆک بارزانی

 

به‌ناوی خوای مه‌زن و میهره‌بان

به‌ڕێزان سه‌رنووسه‌ر و رۆژنامه‌نووس و كارمه‌ندانی رۆژنامه‌ی "خه‌بات"

سڵاو و ڕێز..

به‌بۆنه‌ی 56 ساڵه‌ی بەئاشكرا ده‌رچوونی رۆژنامه‌ی " خه‌بات"ـەوە گه‌رمترین پیرۆزباییتان ئاراستە دەکەم.

ئەمساڵ لە کاتێکدا یادی دامەزراندنی "خەبات" دەکەینەوە کە گەل و وڵاتمان بە قۆناخێکی هەستیاردا دەڕوات و تیرۆریستان شەڕێکی دڕندانەیان بەسەر کوردستاندا سەپاندووە، بەڵام لە سایەی خوێنی شەهیدان و پێشمەرگە قارەمانەکانەوە گەلی کوردستان بە سەربەرزییەوە بەسەر دوژمندا سەرکەوتووە و هیچ بستێک لە خاکی کوردستان لەژێر دەستی تیرۆریستاندا نامێنێتەوە.  رۆژنامه‌ی "خه‌بات" وەکچۆن هەمیشە بە گیانێکی پێشمەرگانەوە داكۆكیكارێكی مافه‌ ره‌واكانی گه‌لەکەمان بووه‌ و رۆڵی به‌رچاویشی له‌ بڵاوكردنه‌وه‌ی هوشیاری نه‌ته‌وه‌یی و بنیادنانه‌وه‌ی مرۆڤی كورددا بینیوە، لەم قۆناخەشدا ئەرکی خۆی لە برەودانی گیانی بەرگری و نیشتیمانپەروەری بەباشی بینیوە و وەک کەناڵێکی ڕاگەیاندن بەرپرسیارانە و دڵسۆزانە کاری کردووە.

هیوادارم هەموو کەناڵەکانی ڕاگەیاندنی کوردستان پابەندی بنەما پیشەییەکانی ڕۆژنامەگەری و ئەرکی نیشتیمانی و پاراستنی یەکڕیزیی گەلەکەمان بن.

دەستخۆشیتان لێ دەکەم و هیوای سەرکەوتنی زیاترتان بۆ دەخوازم.

مسعود بارزانی

سه‌رۆكی هه‌رێمی كوردستان

4ـی4ـی2015