سكرتێری گشتیی ڕێكخراوی نەتەوە یەكگرتووەكان لەڕێی تەلەفۆنەوە پەیوەندی بە سەرۆك بارزانی كرد
هەولێر-KDP.info-سکرتێری گشتیی رێکخراوی نەتەوە یەکگرتووەکان (بان کیمۆن) لەڕێی تەلەفۆنەوە پەیوەندی بە سەرۆک بارزانی کرد و پیرۆزبای لەسەرۆک بارزانی کرد بەبۆنەی سەرکەوتنەکانی هێزی پێشمەرگە بەسەر تیرۆریستانی داعشدا؛ هاوکات بان کیمۆن دەیشڵێت کە زۆری پێخۆش بووە سەردانی هەرێمی کوردستان بکات، بەڵام دڵتەنگبووە لەبەر کەمی کات نەیتوانیوە سەردانی هەرێم بکات.
ئەمڕۆ دووشەممە 30ـی 3ـی 2015 بان كیمۆن سكرتێری گشتیی ڕێكخراوی نەتەوە یەكگرتووەكان لەڕێی تەلەفۆنەوە پەیوەندی بە سەرۆك بارزانی كرد.
لەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان دڵگرانیی خۆی نیشاندا كە سەرباری ئەوەی زۆری پێخۆش بووە بەڵام بەهۆی كەمیی كات نەیتوانیوە سەردانی هەرێمی كوردستان بكات. هەروەها پیرۆزبایی لە سەرۆك بارزانی كرد بە بۆنەی سەركەوتنەكانی هێزی پێشمەرگەی كوردستان لەبەرانبەر تیرۆرریستانی داعش و سەرەخۆشی لە خانەوادەی شەهیدانی پێشمەرگە كرد و ستاییشی ڕۆڵی هێزی پێشمەرگەی كرد لە شكستدانی تیرۆریستانی داعش.
هەر لەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان دەستخۆشی لە خەڵك و حكوومەتی هەرێمی كوردستان كرد كە یارمەتیی ئاوارە و پەنابەرانیان داوە و ڕایگەیاند كە ڕێكخراوی نەتەوە یەكگرتووەكان هەوڵ دەدات بەردەوام بێت لە هاوكاریكردنی هەرێمی كوردستان بۆ حەواندنەوەی ئاوارەكان و ئاستی هاوكارییەكانیش زیاتر بكات. لە بەشێكی دیكەی ئەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان خۆشحاڵیی خۆی نیشاندا كە پەیوەندییەكانی نێوان هەرێم و بەغدا لە قۆناغێكی باشتر دان و هەوڵەكان بۆ چارەسەربوونی گرفتەكان بەردەوامن.
