رێکاره‌كانی حکوومەت وای کردووە جوڵەی بازرگانی زیاد بێت
ھەولێر-KDP.info- سەرۆکی یەکێتی ژوورەکانی بازرگانی لە ھەرێمی کوردستان گوتی، رۆژە بەرۆژ پەیوەندی بازرگانیمان لەگەڵ وڵاتانی جیھان فراوانتر دەبێت و وڵاتی زیاتر دێن بۆ ھەرێمی کوردستان کاری بازرگانی بکەن و ھەر ئەمساڵ چەند وڵاتێکی دیکە ھاتوون، لەوانە ھیند و بەنگلادیش و چەند وڵاتێکی دیکە.
سەرۆکی یەکێتی ژوورەکانی بازرگانی لە ھەرێمی کوردستان، دارا جەلیل خەیات، بۆ ماڵپەڕی فەرمیی پارتی دیموکراتی کوردستان گوتی: "دۆخی بازرگانی لە ھەرێمی کوردستان باشە و بازاڕ ئێستا جێگیر بووە بەھۆی ئەو رێکارانەی حکوومەتی ھەرێمی کوردستان ناویەتی وای کردووە جوڵەی بازرگانی زیاد بێت، چونکە ئەمە وای کردووە کە نرخی کەلوپەل ھەرزان بێت و جوڵەی بازرگانیش زیادبێت، کە حکوومەت باجی لەسەر چەندین کەلوپەل ھەڵگرتووە، بۆیە ئێستا بەشێوەیەکی گشتی لە ھەرێمی کوردستان دۆخی بازرگانی باشە".
دارا جەلیل خەیات گوتیشی: "پەیوەندیمان لەگەڵ وڵاتان باشە و پەیوەندی بەردەواممان ھەیە و شاندی بیانیش بەردەوام بۆ ئێمە دێن و پڕۆتۆکۆلی بازرگانیمان لەگەڵ زۆر وڵات ھەیە و ھەر ئەمساڵ چەند وڵاتێک ھاتوون بۆ ھەرێمی کوردستان و کارمان لەگەڵیان کردووە وەکو بەنگلادیش و ھیند و چەند وڵاتێکی دیکە و بەردەوام لەھەوڵداین بۆ ئەوەی پەیوەندیەکان لەبواری بازرگانی لەگەڵ وڵاتان فراوانتر بکەین و زیاتر ڕایانبکێشین بێن لە ھەرێمی کوردستان کار بکەن".
بڵند ئیبراھیم
