ئەڤرۆ چەندین پرۆژە ل قەزا زاخۆ هاتنە ڤەکرن
دهۆک- KDP.info- د رێورەسمەکی دا چەندین پرۆژە ئەڤرۆ رۆژا 8/9/2030 ب ئامادەبوونا (د.عەلی تەتەر) پارێزگەرێ دهۆکێ ل قەزا زاخۆ هاتنە ڤەکرن.
د.عەلی تەتەر، پارێزگەرێ دهۆکێ د پرێس کۆنفرانسەکی دا گۆت: "پشتی ل هەیاما بۆری سەرۆکێ حکومەتا هەرێما کوردستانێ سەرەدانا قەزا زاخۆ کری و بڕیار دایی چەندین پرۆژێن خزمەتگۆزاری ل قەزا ناڤهاتی بهێنە چێکرن ئەڤرۆ چەندین پرۆژە مە ل قەزا زاخۆ ڤەکرن کو ل دووڤ ڕاسپاردا جەنابێ سەرۆکێ حکومەتا هەرێما کوردستانێ هاتبوونە چێکرن ژ وان پرۆژان ڤەکرنا جادا 30 مەتری ب درێژاهیا 700 مەتران ل تاخێ سنوور یێ قەزا زاخۆ ب کۆژمێ 254 ملیۆن دیناران ل سەر بۆدجا کابینا نەهێ یا حکومەتا هەرێما کوردستانێ هاتیە بجهئینان، هەروەسا ڤەکرنا جادا 10 مەتری ب درێژاهیا 500 مەتران ل تاخێ هیزل ب کۆژمێ 68 ملیۆن دیناران کو ئەڤ پرۆژە ژی هەر ل سەر بۆدجا حکومەتا هەرێمێ هاتیە بجهئینان".
ناڤهاتی ئاماژە دا وێ چەندێ کو ژبلى ڤان پرۆژان هنده‌ك پرۆژێن گرنگ و ستراتیجى ل ئاینده‌كێ نێزیك دێ ب رێكا ته‌نده‌را بۆ خزمه‌تكرنا خه‌لكێ قه‌زا زاخۆ هێنە ڕاگەهاندن و گۆت: "مەرەم ژ چێكرنا ڤان پرۆژا ئه‌وه خزمه‌تا خه‌لكێ هه‌موو تاخان بێ جوداهى بهێته كرن و ب تایبه‌ت تاخێن هه‌ژارنشین".
رێوار محەمەد رەشید
