گرێبەست بۆ خۆبەخشێن دھۆکێ ھاتنە ئیمزاکرن

دھۆک KPD.info- بەرپرسێ راگەھاندنێ ل رێڤەبەریا گشتی یا ساخلەمیا پارێزگەھا دھۆکێ دیار کر کو ناڤەندا ھەڤپشک یا ھەماھەنگی و قەیرانان ب پشتەڤانیا رێکخراوا GIZ یا ئەلمانی ئەڤرۆ رۆژا ١/٩/٢٠٢٠ رابوون ب ئیمزاکرنا (٤٠) گرێبەستان بۆ پەرستارێن د ددەمێ بۆری دا ب شێوەیێ خۆبەخش د ناڤ دامودەزگەھێن ساخلەمیا دھۆکێ دا کار کرین.

حەمزە رەزیکی، بەرپرسێ راگەھاندنێ ل رێڤەبەریا گشتی یا ساخلەمیا پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو د ھەیاما بۆری دا ڤان (٤٠) پەرستاران یێن کو ئەڤرۆ گرێبەست ژ لایێ ناڤەندا ھەڤپشک یا ھەماھەنگی و قەیرانان ب پشتەڤانیا رێکخراوا GIZ یا ئەلمانی بۆ ھاتینە ئیمزاکرن  ب شێوەیەکێ خۆبەخش خزمەتا کەرتێ ساخلەمیێ ل پارێزگەھا دھۆکێ کریە، ئەڤ گرێبەستە ژی دێ بیتە ھاندانەک کو پتر د کارێ خوە دا د خەمخۆر بن و خزمەتا نەخۆشان بکەن.

ناڤھاتی ئاماژە دا وێ چەندێ کو ئەڤ گرێبەستە بۆ دەمێ دو سالان دێ یا بەردەوام بیت و پەرستارێن گرێبەست بۆ ھاتیە ئیمزاکرن دێ ب مووچەکێ ھەیڤانە د ناڤ دامودەزگەھێن ساخلەمیا پارێزگەھا دھۆکێ دا کارکەن و گۆت: "ساخلەمیا دھۆکێ گەلەک پێدڤی ب پەرستاران ھەیە ب تایبەتی پشتی ڤایرۆسێ کۆرۆنایێ ل پارێزگەھا دھۆکێ بەلاڤ بووی".
رێوار محەمەد رەشید