ئیمزایا ڕێککەفتنا نەفتێ دناڤبەرا هەسەدێ و ئەمریکا دا....کارڤەدانێن جیهانی!

رۆژئاڤایێ کوردستانێ-KDP.info- پشتی کو ڕێککەفتنا دوماهیکێ یا دناڤبەرا هێزێن سوریا دیموکرات''هەسەدێ'' و کۆمپانیا ''دیلتا کریسنت ئینیرجی'' یا ئەمریکی ژبۆ نوژەنکردن و وەبەرهێنانێ دا ل باکوور و رۆژهەلاتی سوریا دا هاتییە ئیمزاکرن کارڤەدانێن جیهانێ ب دوویڤ خۆڤە ئینان.

هێزێن سووریا دیموکرات هەسەدێ HSD ــێ، یێن کو ژ لایێ ئەمریکا ڤە دهێنە پشتەڤانی کرن، د رەوش و ئالۆزیا نها دا ئەڤ رێککەفتنە کرین بوویە جهێ گومانەکا مەزن، بەشەک ژ چاڤدێڕان ئەڤێ یەکێ بالکێشی دزانن.

نەفتا سوریا بەری بوویەرێن ساڵآ ٢٠١١ـێ کو ب ناڤێ "شۆرەشـ"ــا سووری دهێتە ب ناڤ کرن، رۆژانە ٣٦٠ هەزار بەرمیل دهاتنە فرۆتن و پشتی ساڵا ٢٠١١ـی نەفت هاتە کێمکرن بۆ ٦٠ هەزار بەرمیلان، چونکی رژێما ئەسەدێ چەندین کێلگەهێن نەفتێ ژ دەستدان و ئەو نەفت کەفتە دبن دەستهەڵاتا هەڤپەیمانێن ئەمریکیدا.

''رژێما سوریا''

سێکتەرێ نەفتێ ددەستێ بنەمالا ئەسەدی دابوون، بەلێ پشتی دەستپێکرنا شۆرەشا سوریێ نەفت هاتییە دابەشکرن و فۆکسا جیهانی کەفتییە سەر ڤی سێکتەرێ گرنگ و رژێما ئەسەدی ژی دنالت د کریزاندا و چەندین وەڵات هاتنە دهەڤکێشەیا سیاسییا سووری دا، ب گۆرەی زانیارییان پشتی کو کێلگەهێن نەفتی کەفتینە دەستێ داعشێ دا، هەسەدێ ئەو کێلگەهێن نەفتی ژ دەستێ وان ئینانەدەر و نها زۆربەیا هەرە زۆر ددەستێ کوردان دانە.

پشتی ڤێ رێککەفتنێ; هەرچی بلەز بوو، دیمەشقێ ئەڤ پێنگاڤە ب ''دزی و زێدەگاڤی'' وەسفکر بۆ سەر سەروەرییا وەڵاتی، و تۆهمەتێن دزینا نەفتا سوریا دیارکر ژ لایێ ئەمریکا ڤە.

٣٠ هەیڤا ٧ـدا سیناتۆرێ ئەمریکی لینسی گراهام رایگەهاندبوو کو مەزلووم عەبدی فەرماندارێ هەسەدێ ئەو راسپاردییە وەک هەڤپەیمانەکێ دناڤبەرا وان و کۆمپانییەکا ئەمریکی ژبۆ نووژەنکرن و لێگەریانا نەفتێ.

چاڤدێرێ سیاسیی (بارزان لیانی) ژ رۆژئاڤایێ کوردستانێ دبێژیت، ئەڤێ هەڤپەیمانێ دوو بەش هەینە ئەرێنی ونەرێنی هەیە چونکی ئەڤ هەڤپەیمانیە دێ بۆ ماوەێ ٥ ساڵا بیت و هێزێن ئەمریکی دێ چاڤدێریێ کەن، ئەڤە ژی بوویە جهێ دلخۆشیا خەلکێ رۆژئاڤا چونکی دبیت ئەڤ سامانە ل خەلکێ رۆژئاڤایێ کوردستانێ ژی بهێتە بەڵاڤکرن چونکی کریزا دارایی ل دەڤ خەلكێ هەیە.

"چونکی گەلەک کێلگەهێن نەفتێ ددەستێ ئەمریکییان دانە ژ وانا ژی کێلگەها عومەر و تەنەکێ دکەڤیتە رۆژئاڤایێ دیرۆزێ و کێلگەها کۆنیکۆ یا غازێ، ڕاستە جهێ بالکێشبوونێ یە کو ئەڤ هەڤپەیمان نە دناڤبەرا ڕیڤەبەرییا خۆسەر و ئەمریکا دایە، بەلکوو دناڤبەرا هەسەدێ دایە ئەڤە ژی بوویە جهێ گوومانێ. لیانی وەسا بۆ ماڵپەڕێ فەرمیێ یێ پارتی دیموکراتی کوردستان دیارکر.

وەزیرێ نەفتا سوریا، عەلی غانم، د هەیڤا ٥ ـدا راگەهاندبوو رۆژانە وەڵاتێ وان پێدڤی ب ١٤٦ هەزار بەرمیلێن نەفتێ یە، و ئەوا نها دهێتە بەرهەمئینان بتنێ ٢٤ هەزارن کەواتە رۆژانە پێدڤی ب ١٢٢ هەزارایە. ژبەر ڤێ یەکێ ژی سووریا ''کۆمێنت'' کر و ب توندی ئەڤە هەڤپەیمانیە ب ''دزی'' وەسفکرن.

ناڤهاتی ئاماژەدا، ئەڤ هەڤپەیمانیە درێژیێ نەکێشیت ژی، بەلکو ئەڤ هەڤپەیمانە زێدەتر بۆ وێ یەکێ کو فشار ل سەر دەستهەڵاتا ئەسەدی بهێتە کرن، وەک ئەم دزانین یاسایا'' قەیسەر'' بەرفرەهتر دبیت گەهشتە حافز ئەسەد ژی دەست ب سەر مال و مولکێ وی دا گرت، ژبۆ وێ یەکێ یە کوو دیمەشق کێمتر تەنازولاتا بکەت.

ئەمریکا چی دڤێت؟

سەرەرایی کو ئەمریکا ئەڤ رێکكەفتنە لە گەل رێڤەبەریا خۆسەر نەکرییە، پسپۆرەکی سیاسەتا نیڤدەولەتی ددەتە خویاکرن، کو ترەمپ پشتی پەشیمانبوون و خۆڤەکێشانی ژ سووریا و بریارا پاراستنا کێلگەهێن نەفتی دایی ئەڤە ژی دبیتە بێ بەهربوونا رژێما سووریا ژ ژێدەرێن داهاتێن ئابووری، رێكکەفتنا ئەمریکا ل هەسەدێ ب کردار رژێما ئەسەدی بێ بەهر کر ژ ژێدەرەکی گرنگێ ژیانێ، بەریا نها ڕیڤەبەریا خۆسەر مەجبوور بوو ژبۆ ئیدارەکرنا ئابووریێ د رێکا کەسێ سێیێ دا بدەتە دیمەشقێ، نها ئەڤ رێکە ژی هاتە داخستن.

د.سەردار شەریف بۆ ماڵپەرێ فەرمیێ پارتی دیموکراتی کوردستان گۆت'' نها رۆژئاڤایێ کوردستانێ دشێت خۆ دوور کەت ژ ڕژێمی و دبێت گرەنتیەکا سیاسیی ژی ژ ئەمریکا وەرگرتبیت و جارەکا دی دانووستاندنان ل گەل رژێمی نەکەن پشتی گرەنتیکرنا ژێدەرێ داهاتێ دارایی.

رێککەفتن....!!!

د. فەرید سەعدوون، شارەزا دکاروبارێن سووریا دا گۆت:" ئەم نەشێن بێژن ئەڤا هاتییەکرن دناڤبەرا هەسەدێ و ئەمریکا دا رێککەفتنە، چونکی بەری نها ژی ئەڤ کێلگەهێن پەترۆلێ ددەستێ ئەمریکیا دابوون بەلێ ئەمریکیا نەدشیا ژبەر یاسایێن نیڤدەولەتی ئەوێ نەفتێ بینیتەدەر دا کو دیاسایێن نیڤدەولەتی دا نەبیتە "دزی"، ژبەر هندێ ژی رابووییە ب ل هەڤهاتنەکێ ل گەل کۆمپانییەکێ ل گەل هەسەدێ.

هێشتا خاڵێن رێککەفتنێ دیارنەبووینە بۆ ڕایا گشتی، سەعدوونی بۆ ماڵپەرێ فەرمیێ پارتی دیموکراتی کوردستان گۆت:" کڕین و فرۆتنا وێ نەفتێ ل گەل چەندین ئالییان بوو ژوانا ژی داعش و سوپایی ئازاد، ئەڤەژی نە دبەرژەوەندییا ئەمریکا دا بوو.

"مەبەستێن ئەمریکا ل سەر ل هەڤهاتنێ هەینە، ئەڤ پەترۆل دچۆ بانیاس و حەمس و تەرتووسێ، ئەڤ ژی دبوو پاڵپشتییەک بۆ رژێمێ، ئەمریکا دڤیا ئەڤێ پالپشتیێ ببڕیت و یاسایا قەیسەر ئەکتیڤ بکەت، ئەمریکا دڤیا دوو پاڵاوگەها چێکەت و رژێما سوریا ژی مفایێ ژێ نەبینە و خەرجییا هەسەدێ ژی پێ دابین بکەت."

"دانپێدان"

ئەڤ ڕێککەفتن بوو مژارەکا جیهانی هەرچی میدیایا جیهانی هەبوو بەحس ل رێککەفتنێ کر و لێکدانێن جودا هەبوون هندەک میدیایا ئەڤ پێنگاڤ ب "دانپێدان" ب رێڤەبەریا خۆسەر ددانە دیارکرن، سەعدوونێ ئەڤ یەکە ب تەمامی "رەتکر" و گۆت: هیچ تشتەکی وەسا نینە، ئەمریکا ب مەزن و بچوویک ڤە دبێژن هاتنا مە بۆ سووریا بۆ شەرێ داعشێ و رێککەفتن ل هەسەدێ ئەوبوو کو هەسەدە هێزەکا رێکخستییە.

گۆتژی:" ئەمریکی ژ ئالیێ سیاسیی و دیبلۆماسی پشتگیرییا ڕێڤەبەرییا خۆسەر ناکەن، و ئەگەر ئەمریکا رێککەفتنەکێ ل گەل ئالییەکی بکەت دڤیت ئەرێ بوونا وەزارەتا گەنجینەیا ئەمریکا و وەزارەتا دەرڤە هەبت، ژبۆ گازندە ژ ئەمریکا نەبیت د سازیێن نیڤدەولەتیدا، ئەمریکا نەچاردبیت ئەگەر بڤێت رێککەفتنەکێ بکەت دڤیێت "دانپێدانێ" ب ئیدارەیا خۆسەر بکەت، ژبەر هندێ ژی نەڤیا و نهۆ نەڤێت، رابوو ل گەل فەرماندارەکی لەشکەری رێککەفتن ئەنجامدا ژبۆ کوو بیانوییا وێ ل جهــ بیت و خۆ ژ پرسێن یاسایی دا ئالییەکی.

 

کاروان باعەدری