مەكتەبی سیاسیی پارتی سەری ساڵی نوێی كۆچی پیرۆز دەكات

هەولێر-KDP.info- مەكتەبی سیاسیی پارتی دیموكراتی كوردستان، بە بۆنەی سەری ساڵی نوێی كۆچییەوە، پەیامێكی بڵاو كردەوە و رایگەیاند: "ئومێدەوارین ئەم بۆنە پیرۆزە ببێتە مایەی خێروخۆشی و هەوێنی چەسپاندنی ئاشتەوایی و پێكەوەژیان بۆ تێكڕای پێكهاتەكانی كۆمەڵگەی كوردستان".

ئەمە دەقی پەیامەكەیە:

بە بۆنەی هاتنەوەی سەری ساڵی نوێی كۆچییەوە (یەكی موحەرەم) گەرمترین پیرۆزبایی لە سەرجەم موسڵمانانی كوردستان بە تایبەتی و، عێراق و جیهان بەگشتی دەكەین، ئومێدەوارین ئەم بۆنە پیرۆزە ببێتە مایەی خێروخۆشی و هەوێنی چەسپاندنی ئاشتەوایی و پێكەوەژیان بۆ تێكڕای پێكهاتەكانی كۆمەڵگەی كوردستان، هەروەها دوورخستنەوە و بنبڕكردنی بیر و خولیای توندوتیژی و شەڕانگێزی و لێكترازانی كۆمەڵایەتی لە ناو كۆمەڵگاكەماندا.

هیواخوازین لەو بۆنە پیرۆزەدا زیاتر گیانی برایەتی و تەبایی و یەكڕیزیی نێوان تاكەكانی كۆمەڵگا و تەواوی حزب و لایەنە سیاسییەكان پتەوتر بێت بۆ زیاتر بەرقەراربوونی سەقامگیری و ئاسوودەیی و ئارامی و خۆشگوزەرانی بۆ تێكڕای هاووڵاتیانی كوردستان.

جارێكی دیكە سەری ساڵی نوێی كۆچی لە سەرجەم موسڵمانان پیرۆز بێت.

 

مەكتەبی سیاسیی پارتی دیموكراتی كوردستان

1ی موحەرەمی 1441ی كۆچی

31/8/2019ی زایینی