سەرۆك بارزانی لەگەڵ ئەندامانی ڕێكخراوی نەوەكانی ئەیلوول كۆبۆوە

 

هه‌ولێر-KDP.info-  ڕۆژی سێشەممە 27ـی 8ـی 2019 لە سەلاحەددین سەرۆك مەسعوود بارزانی لەگەڵ ئەندامانی ڕێكخراوی نەوەكانی ئەیلوولی سنووری لقی 26ـی گوڵانی پارتی دیموكراتی كوردستان كۆبۆوە.

 

لەو كۆبوونەوەیەدا سەرۆك بارزانی سوپاس و پێزانینی خۆی ئاراستەی ڕێكخراوی نەوەكانی ئەیلوول كرد لە بەرانبەر ئەو كار و چالاكییانەی كە لە دەڤەری باڵەكایەتی بۆ پاراستن و نۆژەنكردنەوەی شوێنەوار و یادگارییەكانی شۆڕشی ئەیلوول ئەنجامیان داوە و بە ئەركێكی پیرۆزی لە قەڵەم دا و، هیوای سەركەوتن و بەردەوامیی بۆ خواستن.

 

لە درێژەی ئەو كۆبوونەوەیەدا سەرۆك بارزانی جەختی لە پاراستنی ئەو بەها و دەستكەوتانە كردەوە كە بە خوێن و خەباتی میللەتەكەمان هاتووەتە دی و ڕاشیگەیاند پێویستە بەهاكانی گەلەكەمان بە زیندوویی ڕابگیرێن و ئەركی هەموو لایەكیشمانە كە ڕووبەڕووی ئەو هەوڵانە ببینەوە كە ئامانجیان تێكدانی فەرهەنگ و بەهاكان و بێڕێزیكردنە بە سەروەرییەكانی گەلی كوردستان.