فەرماندەیێن پێشمەرگەی: ژ هزر و بیرێن سەرۆک بارزانی فێری ڤیانا وەڵات و پێشمەرگایه‌تیێ بووین
دهۆک-KDP.info- فەرماندەیێن پێشمەرگەیی ددەنە خویاکرن، کو هەردەم سەرۆک بارزانی بوویە خۆ کریە قەڵغان بۆ گەلێ خۆ، و ئامادەبوونا وی ل چەپەران مۆرالەکا زێدەتر بوو بۆ پێشمەرگەیان.
ل ١٦ـی ئابا ١٩٤٦ـێ پارتی دیموکراتی کوردستان هاتە دامەزراندن، و هەمان رۆژ سەرۆک بارزانی ژی ژدایکبوو، و هەتا نها ٥٧ ساڵ ب سەر پێشمەرگایەتیا سەرۆک بارزانی دا دەرباز دبن.
سەرۆک بارزانی د تەمەنێ ١٦ ساڵیێ دا بوویە پێشمەرگە، هەروەسا سەرۆک بارزانی د پەرتووکا ''بارزانی و بزاڤا رزگاریخوازا کورد'' دا بەحسا پێشمەرگایه‌تییا خۆ دکەت و دبێژیت:'' ژبەر کێم تەمەنیا من دا پێ باشنەبوو ئەز چەکی هەلگرم و ببمە پێشمەرگە، من ژی مامێ خۆ شێخ ئەحمەد راسپارد کو بابێ من رازی بکەت ئەز ببەمە پێشمەرگە، دبێژیت:'' وی دەمی تەمەنێ من ١٦ ساڵ بوو، چۆمە خزمەتا بارزانی و بڕنۆیەک دایه من و سەر چیایەکی دکەفتین و گۆت ئەڤ چۆنا سەر چیایی تاقیکرنە بۆتە و ئەگەر بێ ماندووبوون سەرکەفتی دێ بیە پێشمەرگە لگەل مە، ژبەر ڤیانا من بۆ پێشمەرگایه‌تیێ من هەست ب ماندووبوونێ نەکر.
فەرماندە لیوا بەهجەت سێلکی، ئەندامێ فەرماندا زێرەڤانی دبێژیت، ئەو ڕێبازا سەرۆک بارزانی تێدا پەروەردە بووی، ئەم ژی دێ هەڤڕیبازبین چونکی ژ ڤیان و کوردپەروەری و ڤیان بۆ ئاخ و وەڵاتی فێربووین کو هیچ جارەکی سازشێ بۆ دوژمنی نەکەین.
ناڤبری دبێژیت ژی، سەرۆک بارزانی لگەل هەموو فەرماندە و پێشمەرگەیان ل بەرەیێن پێشیێ یێن شەڕی بوو، و مە هەست پێدکر کو هیچ هێزەک نەشێتە مە، چونکی هاتنا سەرۆک بارزانی بۆ بەرەیێن شەڕی پاڵپشت و پشتەڤانییەکا هەری مەزن بوو بۆ پێشمەرگەیان.
هەروەسان، فەرماندە بابەکر زێباری، سوپاساڵارێ بەرێ یێ عێراقێ ڕاگەهاند، هەر ژ زارۆکینی و هەتا ب مەزنی ژی سەرۆک بارزانی ڤیانا وی بۆ پێشمەرگایه‌تی و پاراستنا ئاخ و وەڵاتی هیڤیەکا هەری مەزن بوو، هەردەم گەورەترین پلە و پۆست دژیانا وی دا پێشمەرگایەتی بوو.
ناڤهاتی بۆ ماڵپەرێ فەرمیی یێ پارتی دیموکراتی کوردستان گۆت:'' ئەڤ یەکە ب کریار چەسپاندییە کو ل شەڕی داعشێ خۆ کربوو قەڵغان ژبۆ پاراستنا شەڕەف و کەرامەتا گەلێ خۆ.
هەڤدەم، فەرماندە بەدەل بەندی، کو ئەو فەرماندەیێ ناسیار ب پەیڤا ''خۆ نەچەمینن'' دبێژیت، ژ ڤیان و رێبازا سەرۆک بارزانی بۆ وەڵاتی، ئەم ژی فیر بووین ببینە هەڤرێبازێن وی، چونکی هەموو ئارمانج و هیڤیا وی ئەوبوو گەلێ وی هیچ جاران بندەست نەبیت.
بەندی دبێژیت ژی، سەرۆک بارزانی و رێک و رێبازا وی دیرۆک شاهدە کو بۆ هیچ هێزەکێ خۆ نەچەماندییە ژبەر هندێ ئەم ژی چ جاران خۆ ناچەمینین، هەتا ئەڤ ڕێبازە هەبیت کوردستان دێ ددەستەکی ئەمین و پاک دابیت.
هەروەسا فەرماندە عەمید سمێ بۆسەڵی، بۆ ماڵپەرێ فەرمیی یێ پارتی ددەتە خویاکرن، ل هەموو سەنگەر و چەپەر و شەڕان سەرۆک و کوڕ و مالباتا خۆ دپێشیا شەڕا دابوون و هەمووان خۆ دکرە قەڵغان و گۆریکرن ژ پێناڤ پاراستنا ئاخا وەڵاتی دروشمێ مەبوو.
بۆسەڵی دبێژیت ژی، د هەموو شەڕێن ناڤچەیێن کوردستانی یێن دەرڤەی ئیدارەیا هەرێمێ دا با، سەرۆک بارزانی هەردەم ب دل و گیان ل گەل مەبوو.
کــاروان بــاعەدری
