دوو کوردی ئێزدی خەڵاتێکی جیھانی وەردەگرن

شنگال-KDP.info-  ساڵانە لە وڵاتی ھیندستان خەڵاتێک بە ناوی خەڵاتی دایکە تێرێزا دەبەخشرێتە ١٠ کەسایەتی و چاڵاکڤانی جیھانی، کە ڕۆڵێکی کاریگەریان لە کاری مرۆڤایەتی و ئاشتی و خۆبەخشی ھەیە و ئەم خەڵاتە لە ساڵی ٢٠٠٥وە تاوەکو ئێستا ساڵانە دەدرێتە ١٠ کەسایەتیی جیھانی.

 

پەیوەست بەم پرسە، مەحما خەلیل، قایمقامی قەزای شنگال، بە ماڵپەڕی فەرمیی پارتی دیموکراتی کوردستانی ڕاگەیاند: "ئەمڕۆ لە وڵاتی ھیندستان خەڵاتی دایکە تێرێزا دەدرێتە ١٠ کەسایەتیی جیھانی کە دوو لەوانە ئافرەتێک و پیاوێکی ئێزدیی ڕزگاربووی دەستی داعشن، کە ئەمەش گرنگیی زۆری بۆ ئێمە ھەیە و ئەو دوو کەسە ئەو خەڵاتە بە ناوی ھەموو کوردانی ئێزدییەوە وەردەگرن."

 

مەحما خەلیل گوتیشی: "لەسەر ئاستی نێودەوڵەتی وەرگرتنی ئەو خەڵاتە بۆ ئێمە زۆر گرنگە، چونکە نامەیەکە بۆ ھەموو وڵاتانی جیھان بۆ ئەوەی بزانن کە چ کارەساتێک بەسەر کوردانی ئێزدی ھاتووە."

 

ھەریەکە لە لەیلا تەحلۆ، ئافرەتێکی ڕزگاربووی دەستی داعش و ئێدیس بەشار، کە ئەویش لە کۆمەڵکوژیی گوندی کۆچۆ ڕزگار بووە، ئەو خەڵاتە وەردەگرن.

 

بڵند ئیبراھیم