نێچیرڤان بارزانی و ئه‌لحه‌لبووسی دۆخی عێرق و پرۆسه‌ی سیاسی تاوتوێ ده‌که‌ن
هه‌ولێر-KDP.info- نێچیرڤان بارزانی سه‌رۆكوه‌زیرانی هه‌رێمی كوردستان و محه‌ممه‌د ئه‌لحه‌لبووسی، جه‌ختیان له پرۆسه‌یه‌كی سیاسیی سه‌ركه‌وتوو بۆ عێراق و له پره‌نسیپی هاوسه‌نگی و سازان و هاوبه‌شیی ڕاسته‌قینه له‌نێوان هه‌موو لایه‌نه‌كان له عێراق كرده‌وه. هیوایشیان خواست قۆناغی داهاتووی عێراق، قۆناغی سه‌قامگیری و ئارامی و ئاسایش و پێشكه‌وتنی وڵات بێ.
پێشنیوه‌ڕۆی ئه‌مڕۆ شه‌ممه 22/9/2018، نێچیرڤان بارزانی سه‌رۆكوه‌زیرانی هه‌رێمی كوردستان، پێشوازی له محه‌مه‌د ئه‌لحه‌لبووسی سه‌رۆكی نوێی ئه‌نجومه‌نی نوێنه‌رانی عێراق كرد.
له دیدارێكدا ئه‌لحه‌لبووسی خۆشحاڵیی خۆی به سه‌ردانی هه‌رێمی كوردستان و دیداری له‌گه‌ڵ سه‌رۆكوه‌زیرانی هه‌رێمی كوردستان ده‌ربڕی؛ هه‌ردوولایش هیوایان خواست په‌یوه‌ندییه‌كانی نێوان هه‌ولێر و به‌غدا و کێشه‌کان له سایه‌ی په‌رله‌مان و حكوومه‌تی تازه‌دا به‌پێی ده‌ستوور چاره‌سه‌ر بكرێن.
لای خۆیه‌وه نێچیرڤان بارزانی پیرۆزبایی له ئه‌لحه‌لبووسی كرد و هیوای سه‌ركه‌وتنی له كاره نوێكه‌یدا خواست؛ هه‌ردوولایش جه‌ختیان له پرۆسه‌یه‌كی سیاسیی سه‌ركه‌وتوو بۆ عێراق و له پره‌نسیپی هاوسه‌نگی و سازان و هاوبه‌شیی ڕاسته‌قینه له‌نێوان هه‌موو لایه‌نه‌كان له عێراق كرده‌وه و هیوایان خواست قۆناغی داهاتووی عێراق، قۆناغی سه‌قامگیری و ئارامی و ئاسایش و پێشكه‌وتنی وڵات له هه‌موو بواره‌كاندا و پێشكه‌شكردنی خزمه‌تگوزارییه‌كان و دروستكردنه‌وه‌ی په‌یوه‌ندیه‌كانی عێراق له‌گه‌ڵ هه‌موو وڵاتانی هه‌رێمی و جیهان، بێت.
به‌ڕێز نێچیرڤان بارزانی هیوای خواست ئه‌م خوله‌ی په‌رله‌مان ته‌واوی ئه‌و یاسایانه ده‌ربکات که خزمه‌ت به عێراق و گشت پێکهاته‌کانی ده‌کات و ڕۆڵیان له چاره‌سه‌رکردنی کێشه‌کان و به‌ره‌وپێشبردنی وڵاتدا ده‌بێت.
