دگەرا 23ێ یا دەرچوونا زانینگەها دهۆکێدا، دێ بەرف کوردستانەکا بهێزتر رێکەڤن.
دهۆک-KDP.info- پ.د.مسلح محەمەدسەعید دهۆکى، سەرۆکێ زانینگەها دهۆک راگەهاند، دگەرا 23ێ یا دەرچوونێدا دێ 4140 قۆتابى باوەرنامەیێن بەکالوریوسێ د 70 بسپوریێن زانستیێن جودادا ل زانکۆیا دهۆک وەرگرن، پشکداریا قۆتابى و دەرچوویێن زانکۆیا دهۆک د پرۆسیسا هەلبژارتنێن پەرلەمانێ کوردستانێدا و دەنگدان ب لیست و کاندیدێن بەرەڤانى ژ ئاخا کوردستانێ کرى و سەدان شەهید داین و نەهێلایى کوردستان بهێتە داگیرکرن دێ بنیاتێ کوردستانێ بهێزتر لێ کەن.
ل ئێڤاریا ئەڤرۆ، 20 ئیلولا 2018ێ دێ زانینگەها دهۆکێ ئاهەنگا دەرچوونا قۆتابیان لژێر درۆشمێ (بەرەف کوردستانەکا بهێزتر) گێریت، بۆ ڤێ ئێکێ پ.د.مسلح محەمەدسەعید دهۆکى، سەرۆکێ زانینگەها دهۆک بۆ مالپەرێ فەرمیێ پارتى دیموکراتى کوردستان گۆت:" زانکۆیا دهۆک تا نهۆ 22 گەرێن دەرچوونێدا نیزیکى 30 هزار قوتابى پتر ژ 60 بسپوریێن جودادا ب باوەرنامە ئێخستینە و پێشکێشى جڤاکى و دام و دەزگەهێن حکومى و تایبەت کرینە، دگەرا 23ێ یا دەرچوونێدا دێ 4140 قۆتابى باوەرنامەیێن بەکالوریوسێ د 70 بسپوریێن زانستیێن جودادا ل زانکۆیا دهۆک وەرگرن".
سەرۆکێ زانکۆیا دهۆک خویاکر:" زانکۆیا دهۆک هەر دەم گرنگى دایە بەرەبابێن نوى و گەنجێن ڤى وەلاتى داکو خزمەتا وەلاتێ خۆ بکەن و ببنە ئاڤەکەرێن مللەتێ خۆ، جونکى دڤى دەمیدا پێدڤییە هەر کەسەک و لایەنەک یێ هاریکار بیت بۆ پێشڤەبرنا سازیێن ڤى وەلاتى و بکەینە شەنگستە و وەلاتێ خۆ لسەر ئاڤا بکەین و کوردستانێ بهێز بێخین".
د. مسلح دهۆکى زەلالکر:" هەرێما کوردستانێ دێ ل 30 ئەیلولا 2018ێ، هەلبژارتنێن پەرلەمانێ کوردستانێ ئەنجامدەت و دێ خەلکێ مە بەرەڤ سندوقێن دەنگدانێ ڤەجیت ، ژبەر هندێ ژ هەمى قۆتابى و دەرچوویێن زانکۆیا دهۆک دخوازم پشکدارى ڤى پرۆسیسا هەلبژارتنان بن و دەنگ ب لیست و کاندیدێن بەرەڤانى ژ ئاخا کوردستانێ کرى و سەدان شەهید داین و نەهێلایى کوردستان بهێتە داگیرکرن، داکۆ بنیاتێ کوردستانێ بهێزتر لێ بکەین".
زانینگەها دهۆک ل 14 ئیلونا 1992ێ، هاتیە دامەزراندن و هەر دوو کولیژێن پزیشکى و چاندنێ بۆ سالا خواندنا 1992-1993 دەست ب وەرگرتنا قۆتابیان کریە، نهۆ ژى سالانە کولیژ و پشک و لقێن زانستى و سەنتەرێن ڤەکولینان ل زانینگەها دهۆکێ دئێنە وەرگرتن، بۆ سالا نوى 2018-2019ێ دى قۆتابی ل 18 کولیژان ئێنە وەرگرتن و ئەڤرۆ دەمیژمیرى پێنچى ئیڤارى دێ ئاهەنگا دەرچوونا گەرا 23ێ یا زانینگەها دهۆکێ ل یانەیا دهۆک گێرن.
هەلز عەلى سەلیم
