ژنێن شۆرەشگێر، دەنگێ مە بۆ لیستا ریفراندۆمجیا یە

دهۆک-KDP.info- ژنێن شۆرەشگێر پێشتەڤانیا خۆ بۆ لیستا 183ێ راگەهاند، ژبەر وێ خەبات و ماندیبوونا د شۆرەشێن کوردیدا هەڤپشک بووین و پشکدارى ریفراندۆما سەربەخۆیا کوردستانێ بووین، کۆ بوویە جهێ شانازیێ دێ دەنگێ خۆ ب پارتى دیموکراتى کوردستان دەن.

ژنا کورد هەر دەم ماندیبوون بۆ ئازادیا کوردستانێ دیتیە، ژبەر ڤێ ئێکێ وان ژى ئاخڤتنا خۆ بۆ هەلبژارتنێن خولا پێنچ بۆ پەرلەمانێ کوردستانێ هەبوویە، (عائیشا محەمەد)، ژنەکا شۆرەشگێر و ژ بنەمالەکا کوردپەروەر، بۆ مالپەرێ فەرمیێ پارتى دیموکراتى کوردستان گۆت:" لسەر دەمێ رژێما بەعسى ژنافچوویێ گەلەک هێرش دکرنە سەر مالێن مە، دهەمان دەمدا ئەم دەربەدەر و ئاوارە کرین، لێ ئەم دخەباتا خویا پێشمەرگایەتیێ دا دبەردەوام بووین، ئیرۆ دەم هات ئەنجامێن ریفراندۆمێ ساخ بکەینەڤە و بۆ هەمیان دیار بوویە پارتى دیموکراتى کوردستان بتنێ خودان پرۆژەیێ دەولەتێ یە، دەنگدانا مە بو لیستا 183ێ، دێ چارەنڤیسێ مە ب دەنگێ مە دیار بیت، دا جارەکا دیتر تووشى دەردەسەرى و بن دەستیێ نەبینە ڤە".

(سافیا ئەحمەد)، ژنەکا دیتر یا شۆرەشگێر، خویاکر:" د هەر دوو شۆرەشێن ئەیلول و گولانێ دا، مە زیندان و دەربەدەرى دیتینە، پشتى سەرهلدانا پیرۆزا سالا 1991ێ، ژنوو بێهنا ئازادیێ ژ وەلاتێ مە هات، نوکە ژى ئەم یێ شەرى بۆ دەولەتا کوردى دکەین و ب هەمى باوەریڤە مە خۆ بەرهەڤ کریە بۆ رۆژا دەنگدانێ، دەنگێ مە بۆ لیستا ریفراندومچیایە و باوەرم دێ رۆژەکێ ب دەنگ و ب تلیلیاڤە ئاهەنگا سەربەخۆیا کوردستانێ لسەر دەستێ پارتى کەین".

(لەیلا سەعید)، ژنەکا قەهرەمان و ژ بنەمالەکا کوردپەروەر و خەباتکەر، بۆ مالپەرێ فەرمیێ پارتى دیموکراتى کوردستان گۆت:" ئەز قۆتابیا رێبازا مەلا مستەفایێ بارزانیێ نەمرم و بەردەوامم لسەر خەباتا خۆ، ژ رەوشتێ وى ڤێرى خەبات و بەرخودانیێ بوویمە، کۆ هەر دەم دگەل شۆرەشێ بوویمە و نوکە ژى ئەو د شورەشەکا مەزنا هزرى و کوردایەتیێ داینە، ژبەر هندێ لیستا 183ێ بتنێ ژ هەژى دەنگێ هەر تاکە کوردەکى یە، جونکى شەرەفا كوردان ب ریفراندۆمێ پاراست و بو دەستکەفتەكا مەزن و رۆژەكا شانازیێ بۆ هەمى مللەتێ کورد".

 

هەلز عەلى سەلیم