نێچیرڤان بارزانی پێشوازی له باڵیۆزی ئیسپانیا له عێراق ده‌كات
هەولێر-KDP.info- نێچیرڤان بارزانی پێشوازی له باڵیۆزی ئیسپانیا له عێراق كرد و لە دیدارەکەدا باڵیۆزی ئیسپانیا ئاماژه‌ی به دۆخی سیاسیی عێراق و پێوه‌ندییه‌كانی نێوان هه‌رێمی كوردستان و ئیسپانیا و به‌ره‌وپێشبردنى زیاتری له بواره‌كانی زانستی، كه‌لتووری و ئابووریدا كرد.
پاشنیوه‌ڕۆی ئه‌مڕۆ دووشه‌ممه 10/9/2018 نێچیرڤان بارزانی سه‌رۆكوه‌زیرانی هه‌رێمی كوردستان، پێشوازی له وان خۆسێ ئیسكۆبار ستێمان، باڵیۆزی ئیسپانیا له عێراق و شاندێكی یاوه‌ری كرد.
له دیدارێكدا ستێمان وێڕاى ده‌ربڕینی خۆشحاڵیی خۆی به سه‌ردانی هه‌رێمی كوردستان و دیداری له‌گه‌ڵ سه‌رۆكوه‌زیران، ئاماژه‌ی به دۆخی سیاسیی عێراق و په‌یوه‌ندییه‌كانی نێوان هه‌رێمی كوردستان و ئیسپانیا و به‌ره‌وپێشبردنى زیاتریان له بواره‌كانی زانستی، كه‌لتووری و ئابووریدا كرد، هه‌روه‌ها ده‌ستخۆشی له حكوومه‌تی هه‌رێمی كوردستان كرد بۆ پێشوازیكرن له ژماره‌یه‌كی یه‌كجار زۆری ئاواره و په‌نابه‌رانی ده‌ستی تیرۆر.
لای خۆیه‌وه نێچیرڤان بارزانى سوپاسی ئه‌و سه‌ردانه‌ی كرد و هیوای سه‌ركه‌وتنی بۆ ستێمان خواست له كار و ئه‌ركه‌كانی، هه‌روه‌ها ئاماژه‌ی به‌وه دا كه هه‌رێمی كوردستان و حكوومه‌ته‌كه‌ی به با‌یه‌خه‌وه سه‌یری په‌یوه‌ندییه‌كان له‌گه‌ڵ ئیسپانیا ده‌كه‌ن و ئاماده‌ن بۆ به‌روپێشبردنی زیاترى په‌یوه‌ندییه‌كانى له هه‌موو بواره‌كاندا و به‌تایبه‌تی بنیاتنانی په‌یوه‌ندیی ئابووریی نێوان هه‌ردوولا و به‌ره‌وپێشبردنی.
تاوتوێكردنی دۆخى سیاسی، پێكهێنانی كابینه‌ی نوێی حكوومه‌تی عێراق، دیالۆگی سیاسیی نێوان لایه‌نه سیاسییه‌كانی عێراق و ڕۆڵی هێزه سیاسییه‌كانی هه‌رێمی كوردستان له پێكهێنانی حكوومه‌ت و به‌شداریكردنی ڕاسته‌قینه‌یان تیایدا، لایه‌نێكی دیكه‌ی دیداره‌كه بوو.
