لەسەر ئاستێكی باڵادا یادی كۆمەڵكوژیی ئێزدیان دەكرێتەوە

 

دهۆك-KDP.info- بەرپرسی راگەیاندنی بنكەی ڕۆشنبیری و كۆمەڵایەتیی "لالش" لە پارێزگای دهۆك، ڕایگەیاند، لەسەر ئاستێكی باڵادا، یادی كۆمەڵكوژیی ئێزدیان لە شنگال، لە پارێزگای دهۆك دەكرێتەوە.

 

لە ٣ـی ئابی ٢٠١٤ـدا، داعش هێرشی كردە سەر شارۆكەی شنگال و كارەساتیان بەسەر ئەو شارەدا هێنا، كە زیاتر لە ٦ هەزار كەسیان ڕفاند و ٣٦٠ هەزار كەس ئاوارەی هەرێمی كوردستان كران و ٧٠ هەزاریشیان ئاوارەی دەرەوەی وڵات بوون، هەروەها زیاتر لە هەزار و ٢٠٠ كەسیش كوژران و هەموو مەزارگە و شوێنە ئایینییەكانیش لە ناوبردران و زیاتر لە ٦٠ گۆڕی بەكۆمەڵیش تا ئێستا دۆزراونەتەوە.

 

جەعفەر سمۆ، بە ماڵپەڕی فەرمیی پارتی دیموكراتی كوردستانی گوت: "بنكەی لالش بە هاوئاهەنگیی پارێزگای دهۆك، یادی كۆمەڵكوژیی ئێزدیان لە شنگال، لە پارێزگای دهۆك لەسەر ئاستێكی باڵادا دەكاتەوە".

 

لە ڕووی جوگرافیاوە ئێزدییەكان لەگەڵ پارچەبوونی كوردستانی گەورەدا، ئەوانیش پارچەبوون و زۆرترینیان لە عێراقن و ٩٠% دەكەونە ناوچە كوردستانییەكانی دەرەوەی ئیدارەی هەرێم لە شێخان و شنگال و ١٠% دەكەونە هەرێمی كوردستان و لە پارێزگای دهۆك نیشتەجێن، ئەوانیش لە باعەدرێ و شاریا و خانكێ و ناوچەی هەوێریان، میرگەی ئێزدییانیش لە باعەدرێ، شوێنی میری ئێزدیانە.

 

بە گوتەی ئێزدیان خۆیان، لە مێژوودا ٧٤ جار كۆمەڵكوژ كراون و لە چەندین وڵاتدا بوونیان هەبووە، بەڵام بە هۆی ئەو كۆمەڵكوژی و جینۆسایدانەوە كە بەسەریان هاتووە، كۆچیان كردووە و ئێستاش زۆربەیان لە یەكێتیی سۆڤیەتی جاران نیشتەجێن، هەروەها زیاتر لە ٢٠ هەزاریش لە جۆرجیان و بە هەزارانیش لە ئەرمینیا و ئەڵمانیا و هۆڵەندا و سوید بوونیان هەیە.

 

جەعفەر سمۆ دەشڵێ: "لە یادی كۆمەڵكوژیی ئێزیاندا، چەندین دۆكیومێنت و شتی تایبەتی ئێزدیان دەخرێنە ڕوو و، هیواخوازین لە ساڵی داهاتوودا ئەم كەیسە بە فەرمی و لەسەر ئاستی جیهاندا بە جینۆساید بناسرێت".

 

كــاروان بــاعەدری