ئه‌و سێ هاووڵاتییه‌ی په‌كه‌كه ڕفاندبوونی ئازاد كران
ڕواندز-KDP.info- قایمقامی قه‌زای سۆران ئاشكرای كرد، ئه‌و سێ گه‌نجه‌ی پێش 10 ڕۆژ له سنووری ناحیه‌ی وه‌رتێ له لایه‌ن په‌كه‌كه‌وە ده‌ستگیر كرابوون، ئه‌مڕۆ ئازاد كران.
په‌كه‌كه به‌رده‌وام كێشه بۆ خه‌ڵكی سه‌ر سنووری هه‌رێمی كوردستان دروست ده‌كات و گونده‌كان داگیر ده‌كات و خه‌ڵكه‌كه‌ی ده‌ڕفێنێت و به هۆی بوونی ئه‌وانیشەوە له‌سه‌ر سنوور به‌رده‌وام توركیا بۆردوومانی ئه‌و ناوچانه ده‌كات و تا ئێستاش به سه‌دان گوند چۆڵ كراون و خه‌ڵكه‌كه‌یشیان ئاواره بوونه و به ده‌یان هاووڵاتیش شه‌هید بوونه و ئێستاش توركیا به هۆی بوونی په‌كه‌كه‌وە خاكی كوردستانی به‌زاندووه و له پێش 10 ڕۆژ په‌كه‌كه له سنووری ناحیه‌ی وه‌رتێ سێ گه‌نجی ده‌ستگیر كرد، كه به مه‌به‌ستی هێنانی گژوگیای سروشتی چووبوونه شاخه‌كان به‌بێ ئه‌وه‌ی هیچ تاوانێكیان ئه‌نجام دابێت و چاره‌نووسیشیان دیار نه‌بوو.
له‌و باره‌یه‌وه، كرمانج عیزه‌ت، قایمقامی قه‌زای سۆران، به ماڵپه‌ڕی فه‌رمیی پارتی دیموكراتی كوردستانی ڕاگه‌یاند: "په‌كه‌كه به‌بێ هیچ هۆكارێك پێش 10 ڕۆژ ئه‌و سێ گه‌نجه‌ی ده‌ستگیر كردبوو و ئه‌مڕۆش به‌بێ هیچ هۆكارێك ئازادی كردوون، چونكه ئه‌وان له‌خۆڕا خه‌ڵكی ده‌ستگیر ده‌كه‌ن، ته‌نیا ئه‌گه‌ر سه‌ردانی سنوورەکەیان بكه‌ن."
كرمانج عیزه‌ت گوتی: "ئه‌و سێ گه‌نجه به ماتۆرسیكل سه‌ردانی ئه‌و ناوچانه‌یان كردووه بۆ هێنانی گژوگیای سروشتی، كه په‌كه‌كه‌ی لێیه و ده‌ستگیریان كردوون و دواتریش هه‌ر خۆیان ئازادیان كردوون، چونكه هیچیان له‌سه‌ر نه‌بووه و په‌كه‌كه ئه‌و ناوچانه كه خاكی هەرێمی كوردستانن به خاكی خۆیان ده‌زانن."
به گوته‌ی عیزه‌ت، ته‌نیا له سنووری سیده‌كان 110 گوند به هۆی بوونی په‌كه‌كەوە چۆڵ كراون و خه‌ڵكه‌كه‌یشیان ئاواره‌ی ناوچه‌كانی دیكه بوون.
ئه‌و سێ هاووڵاتییه خه‌ڵكی ناحیه‌ی وه‌رتێی سه‌ر به قه‌زای ڕواندزی سنووری پارێزگای هه‌ولێرن، به ناوه‌كانی عومه‌ر عه‌بدوڵڵا مه‌حموود و هه‌ڵگورد حەمه‌ده‌مین عه‌بدوڵڵا و دانا خدر هه‌مزه.
بڵند ئیبراهیم
