شاندا ئەنەکەسێ: مە گۆتە رووسیا، مە دەولەتەکا فیدرال و دیموکراتیک دڤێت
دهۆک-KDP.info- شاندا ئەنەکەسێ ل سەر ئەنجاما سەرەدانا خۆیا ژ بۆ رووسیایێ داخویانیەک دا و دیارکرن، کو وان لگەل بەرپرسێن رووسیایێ رەوشا سووریایێ و رۆژئاڤا کفتووگۆ کریە و ب ئاوایەکی ئاشکەرا ژ بۆ بەرپرسێن رووسیایێ گۆتینە، دڤێت د سبەرۆژێ دا سووریا ببیتە دەولەتەکە فیدرال و دیموکراتیک.
شاندەکە ئەنجوومەنا نیشتمانیا کورد ل سووریایێ (ئەنەکەسێ) د ٢٩ێ ڤێ مەهێ دا چۆبوونە رووسیایێ و ل چەندین هەڤدیتن پێکئینان و جیگرێ وەزیرێ کارێن دەرڤەیێ رووسیایێ میخائیل بۆگدانۆڤ ژی د ناڤ دا بوو.
شاندێ ناڤبری دەربارێ وێ سەردانا خۆ دا داخویانیەک بەلاڤ کر و دیار کر کو وان د وان ھەڤدیتنان دا ل سەر رەوشا سووریایێ راوەستیانە و ب تایبەتی ژ بۆ کێشەیا سووریایێ بەحسا پێڤاژۆیا چارەسەرکرنا سیاسی کریە. ھاتە دیارکرن کو ھەردووو ئالیان د جڤینێن خۆ دا مژارا دەستوورا بنگەھینا سووریایێ و کۆمیتەیا ئامادەکرنا وێ دەستووری گۆتووبێژ کرینە.
د داخویانیێ دا ژی ئەو یەکە هاتیە کو شاندا ئەنەکەسێ د جڤینان دا نێرینا خۆیا ژ بۆ سبەرۆژا سووریەیێ ئانینە زمان و گۆتیە، ژ بۆ پاراستنا مافێن ھەموو پێکھاتەیێن ئالیێن ل سووریایێ دڤێت گەرەنتی هەبیت و ب تایبەتی دڤێ مافێن گەلێ کورد بهێنە پاراستن.
شاندێ ناڤبری ئەو چەندە ژی گۆتیە کو دڤێت د سبەرۆژێ دا سووریا دەولەتەکە فیدەرال و دەمۆکراتیک بیت. ھەروسا ھات گۆتن کو وان رەوشا ئەفرینێ ژی نرخاندیە و گۆتیە دڤێ خەلکێ ئەفرینێ ڤەگەرن مالێن خۆ و عەفرین ژ ئالیێ خەلکێ وێ ڤە بهێتە برێڤەبرن.
کــاروان باعەدری
