"هاوپەیمانان دەست بە ناردنی چەک و تەقەمەنی بۆ پێشمەرگە دەکەنەوە"
__2018_05_30_h16m4s8__ER.jpg)
هه‌ولێر-KDP.info- به‌رپرسێكی وه‌زاره‌تی پێشمه‌رگه ده‌ڵێ، هاوكاریی وڵاتانی هاوپه‌یمان بۆ هێزی پێشمه‌رگه به‌رده‌وامە و بڕیاره جارێكی دیكه‌ش ناردنی چه‌ك و ته‌قه‌مه‌نی بۆ هێزی پێشمه‌رگه ده‌ست پێ بكاته‌وه، چونكه تاوه‌كو ئێستا داعش مه‌ترسییه بۆ سه‌ر عێراق.
دوای نه‌مانی هێزی پێشمه‌رگه له ناوچه كوردستانییه‌كانی ده‌ره‌وه‌ی ئیداره‌ی هه‌رێمی كوردستان، جارێكی دیكه داعش له‌و ناوچانه سه‌ری هه‌ڵداوه‌ته‌وه و به شێوه‌یه‌كی به‌رچاو جموجووڵیان زیادی كردووه، به جۆرێك شه‌وانه به‌ئاشكرا له گونده‌كان ده‌چنه سه‌ر خه‌ڵك و تیرۆریان ده‌كه‌ن و ده‌یانڕفێنن.
سه‌رچاوه‌یه‌كی ئاگاداریش له وه‌زاره‌تی پێشمه‌رگه، به ماڵپه‌ڕی فه‌رمیی پارتی دیموكراتی كوردستانی ڕاگه‌یاند: "بوونی شانه‌ی داعش له ناوچه‌كه شتێكی حاشا هه‌ڵنه‌گره و خودی هاوپه‌یمانان و زانیاری هه‌واڵگریی پێشمه‌رگه‌ش ئه‌مه‌ی پشتڕاست كردووەته‌وه، به‌ڵام ئه‌وه ماوه‌ته‌وه چۆن مامه‌ڵه له‌گه‌ڵ ئه‌و پرسه ده‌كرێت، بۆیه پێویسته هاوپه‌یمانه‌تییه‌كی سێ قۆڵی له نێوان هاوپه‌یمانان و پێشمه‌رگه و حكوومه‌تی عێراقدا پێک بهێنرێت بۆ نه‌هێشتنی داعش."
سەرچاوەکە گوتیشی: "ئێستا هه‌ڵبژاردن كراوه و چاوه‌رێی ئه‌وه دەكرێت حكوومه‌تی نوێی عێراق پێک بهێنرێت، پاشان هاوپه‌یمانه‌تییه‌كی نوێ پێک بهێنرێت و ڕووبه‌ڕوی داعش ببنه‌وه."
سالار جه‌باری، جێگری سوپاسالاری پێشمه‌رگه له وه‌زاره‌تی پێشمه‌رگه‌ی حكوومه‌تی هه‌رێمی كوردستان، به ماڵپه‌ڕی فه‌رمیی پارتی دیموكراتی كوردستانی ڕاگه‌یاند: "حكوومه‌تی عێراق هه‌میشه ڕێگری ده‌كات له گه‌یشتنی هاوكاریی به هێزی پێشمه‌رگه، به‌ڵام سه‌ره‌ڕای ئه‌وه‌ش هاوكارییه‌كان هه‌ر به پێشمه‌رگه گه‌یشتوون و ماوه‌یه‌كیشه به هۆی كه‌مبوونه‌وه‌ی داعش كه‌متر هاوكاری ده‌گه‌ن، به‌ڵام هاوكاریی لۆجستی و مه‌شقكردن به هێزی پێشمه‌رگه به‌رده‌وامە."
سالار جه‌باری باسی له‌وه‌ش كرد: "بۆ گه‌یشتنی چه‌ك و ته‌قه‌مه‌نیش ماوەیە‌كه به ده‌ستمان نه‌گه‌یشتووه، به‌ڵام به هۆی سه‌رهه‌ڵدانه‌وه‌ی داعش له ناوچه‌كه جارێكی دیكه ناردنی چه‌ك و ته‌قه‌مه‌نی بۆ هێزی پێشمه‌رگه به‌رده‌وام ده‌بێت و جارێكی دیكه چه‌ك و ته‌قه‌مه‌نی بۆ ئێمه ڕه‌وانه ده‌كه‌نه‌وه، چونكه داعش هێشتا مه‌ترسییه بۆ هێزی پێشمه‌رگه."
هه‌ر له‌م باره‌یه‌وه، به‌ڕێوبه‌ری ڕاگه‌یاندنی ئاسایشی كه‌ركووك، فه‌رهاد حه‌مه عه‌لی، بۆ ماڵپه‌ڕی فه‌رمیی پارتی دیموكراتی كوردستان گوتی: "ڕاسته جموجووڵی داعش له سنووری كه‌ركووك به شێوه‌یه‌كی به‌رچاو زیادی كردووه و شه‌وانه جموجووڵیان به‌ئاشكرا هه‌یه و به‌تایبه‌ت له سنووری داقووق و حه‌ویجه جموجووڵی به‌رده‌وامیان هه‌یه و به‌رده‌وامیش ڕووبه‌ڕووی حه‌شدی شه‌عبی و هێزه عێراقییه‌كان ده‌بنه‌وه و شه‌ڕیان له‌گه‌ڵ ده‌كه‌ن."
هه‌ر دوێنێش به‌رپرسی لقی 15ی پارتی دیموكراتی كوردستان له خانه‌قین، شێخ جه‌عفه‌ر شێخ مسته‌فا، به ماڵپه‌ڕی فه‌رمیی پارتی دیموكراتی كوردستانی ڕاگه‌یاند: "جموجووڵی داعش له سنووری دیاله زۆر زیادی كردووه و به پێی ئامارێكیش نزیكه‌ی 500 چه‌كداری داعش له ناوچه‌كه هەن و شه‌وانه ده‌چنه سه‌ر گونده‌كان و خه‌ڵك ده‌ستگیر ده‌كه‌ن و ده‌یانڕفێنن و خه‌ڵكیش خۆیان به‌رگری له خۆیان ده‌كه‌ن، چونكه هێزه عێراقییه‌كان و حه‌شدی شه‌عبی توانای پاراستنی خه‌ڵكیان نییه."
بڵند ئیبراهیم
