کاندیدێن پارتى ل دهۆک: دێ بەرەڤانیێ ژ مافێن مللەتێ کورد كەین

دهۆک-KDP.info- چوار کاندیدێن پارتى ل سنورێ پارێزگەها دهۆکێ راگەهاند، دێ کار لسەر بجهئینانا دستورى و ئەو بەندێن گرێدایى دامەزراندنا دەزگەهێن دستورى و یاسایى و دانانا دادگەها فیدرالى ب شێوەکێ دروست کەین.

د.ئەحمەد سلیمان، کاندیدێ ژمارا 2ێ پارتى ل دهۆکێ بۆ مالپەرێ فەرمیێ پارتى دیموکراتى کوردستان خویاکر:" لگۆر تایبەتمەندیا خۆ کار لسەر کەلتورێ دارایى و ئابۆرى ل بەغدا کەم، کۆ ئەو مافێن دارایى ل بەغدا دماوەیێ 13 سالادا هاتینە پێشلکرن و ئەو پارێ عیراقێ ب خەرجێن حاکم و سیادێ لسەر هەرێما کوردستانێ هژمارتین و کوردان چ پەیوەندى پێڤە نەبوویى بدەستڤە بینین، دیسان وێ جوداهییا دناڤبەرا بهایێ نەفتێ و بودجێدا دیار بکەین، ژبلى ئەو بودجا چوار سالا ژلایێ عیراقێ ڤە نەهاتیە رەوانەکرن بۆ هەرێما کوردستانێ بکەینە بەلگەکا یاسایى و لگور دستورێ بدەستڤە بینین".

 

دیار تەیب، کاندیدێ ژمارا 3ێ لیستا 184 بۆ مالپەرێ فەرمیێ پارتى دیموکراتى کوردستان بەحسکر، دێ کار بوو گرێدانا پەیوەندیەکا ساخلەم دناڤبەرا حکومەتا مەرکەزى و هەرێما کوردستانێدا کەین لسەر بنیاتێ تەوافقى و بدەستڤەئینانا مافێن مللەتێ کورد یێن جهێ گرنگیدانا هەولاتیێ کوردستانێ.

 

بەیار تاهر، کاندیدێ ژمارا 4ێ پارتى ل دهۆکێ بۆ مالپەرێ فەرمیێ پارتى دیموکراتى کوردستان گۆت:" دێ کار لسەر بجهئینانا دستورى کەم ب تایبەت ئەو بەندێن گرێدایى دامەزراندنا دەزگەهێن دستورى و یاسایى و دانانا دادگەها فیدرالى ب شێوەکێ دروست و کاراکرنا بەندێ 105- 106- 107ێ یێن دەولەتا عیراقێ دکەنە دەولەتەکا فیدرالى".

 

شەپال حەسەن، کاندیدا ژمارا 5ێ پارتى ل دهۆکێ بۆ مالپەرێ فەرمیێ پارتى دیموکراتى کوردستان زەلالکر:" هەبوونا من ل بەغدا کاراکرنا بەندێ 15ێ دستورێ یە، کۆ بەحس ل ئازادى و ئێمناهى کریە و مافێن هەمى پێکهاتەیێن عیراقێ تێدا دپاراستى نە، کار ژبۆ بدەستڤەئینانا مافێن جوتیار و پێشمەرگە و شەهید و ئەنفالکریان کەم".

 

هەلز عەلى سەلیم