نێچیرڤان بارزانی و باڵیۆزی به‌ریتانیا پرۆسه‌ى هه‌ڵبژاردنه‌كانى عێراق تاوتوێ ده‌كه‌ن
هه‌ولێر-KDP.info- له دیداری نێوانیاندا، نێجیرڤان بارزانی و باڵیۆزی به‌ریتانیا له عێراق، پرۆسه‌ی سیاسى و هه‌ڵبژاردن له عێراق به گشتی و هه‌رێمی كوردستان به‌تایبه‌تی و، هه‌نگاوه‌كانی لایه‌نه عێراقییه‌كان بۆ دوای هه‌ڵبژاردن و دانوستانی پێكهێنانی حكوومه‌تی نوێیان خسته ه‌بر باسه‌وه.
ئێواره‌ی ئه‌مڕۆ شه‌ممه 5/5/2018، نێچیرڤان بارزانی سه‌رۆكوه‌زیرانی هه‌رێمی كوردستان، پێشوازی له جۆن وێڵكس، باڵیۆزی به‌ریتانیا له عێراق و مارتن وار كۆنسوڵی گشتیی به‌ریتانیا له هه‌رێمی كوردستان و شاندێكی یاوه‌ریان كرد.
له دیدارێكدا پرۆسه‌ی سیاسى و هه‌ڵبژاردن له عێراق به گشتی و هه‌رێمی كوردستان به‌تایبه‌تی و هه‌نگاوه‌كانی لایه‌نه عێراقییه‌كان بۆ دوای هه‌ڵبژاردن و دانوستانی پێكهێنانی حكوومه‌تی نوێ تاووتوو كرا. هیوایان خواست پرۆسه‌كه سه‌ركه‌وتووانه به‌ڕێوه بچێت و لایه‌نه كوردستانییه‌كان ڕۆڵێكی كاریگه‌ر له پێكهێنانی حكوومه‌تی نوێ و داهاتووی عێراق و چاره‌سه‌ركردنی كێشه‌كاندا ببینن.
هه‌ردوولا باسیان له گفتوگۆى هه‌ولێر ـ به‌غدا كرد و هه‌نگاوه‌كانی پرۆسه‌كه‌یان به‌رز نرخاند، كه بووه هۆی چاره‌سه‌ركردنی به‌شێكى كێشه‌كان و هیوایان خواست گفتوگۆ جیددیتر و فراواتر بكرێت و دوای پێكهێنانی حكوومه‌تی نوێی عێراقی فیدراڵ ئه‌و كێشانه‌ی ماون چاره‌سه‌ر بكرێن.
