ئۆزچەلیک: سەرەدانا مە بۆ هەدەپێ ئەرێنی بوو.. هەدەپێ: ل نێزیک دێ بەرسڤا وان دەین

 

دهۆك-KDP.info-  ئەڤرۆ ئینیێ ٤-٥-٢٠١٨ـێ، شاندەکی پارتێن تفاقا کوردستانی ژبۆ هەلبژارتنان سەرەدانا هەدەپێ کرن، جڤینەک پێکئینان و سەرۆکێ پارتیا ئازادیا کوردستانێ راگەهاند، جڤینا مە دەربارەی هەلبژارتنان ئەرێنی بوو.

موستەفا ئۆزچەلیک دداخویانیەکا ماڵپەرێ فەرمیی یێ پارتی دیموکراتی کوردستان گۆت: ''شاندێ تفاقا کوردستانی ژ ٥ پارت و تەڤگەرێن کوردی پێک دئێت، سەرەدانا هەدەپێ کرن و ل گەل وان جڤیاین و جڤینەک ئەرێنی بوو.

ناڤهاتی ئەو یەکە ژی گۆت: ''د جڤینێ دا مە نامەیەک دا دەستی هەڤسەرۆکا هەدەپێ پەروین بۆڵدان و ئەو دێ ل نێزیک بەرسڤا مە دەن.''

هەر پشتی جڤینێ ژی پەروین بۆڵدان بۆ چاپەمەنیێ داخویانیەک دا و دیارکر، کو ئەم ل نێزیک دێ بەرسڤا تفاقا کوردستانی دەین ژبۆ هەلبژارتنان.''

ئۆزچەلیکی دیارکر، د تفاقا کوردستانیدا چەند خال هەنە و هەر کەس و لایەنێ ل گەل  ڤان خال و پرەنسیپێن مە بگونجیت ئەم دێ تفاقێ ل گەل پێک ئینن و بەریا دوو رۆژان ئەم ب (HUDA-PAR)ـێ ژی را جڤیان.

ھەڤسەرۆکا ھەدەپێ پەروین بوڵدان ل پێش دەریێ نڤیسینگەھا پارتیا خوە بۆ چاپەمەنیێ گۆت: ''ئەم گەلەک کەیفخۆشن کو ئەڤ ٥ پارتیێن کوردستانی سەردانا پارتیا مە کرن.  بەریا ھلبژارتنێن ٢٤ ـێ حزیرانێ ھەڤپەیمانیا کوردان ژ بۆ پاشەرۆژێ گەلەک گرنگ و واتەدارە. پارتیێن کوردستانی چەند داخواز ژ مە کرن. داخوازێن وان د ھەمان دەمێ دە داخوازێن مەیێن ھەڤپارن. بێگوومان داخوازێن وان مرۆڤ دکارە قەبوول بکەت.''

بوڵدان گۆت ژی: ''ئەم دێ ب زووترین دەم دا بەرسڤەکێ بدەن وان. بەرفرەھکرنا ڤێ ھەڤپایمانیێ ژ بۆ پاشەرۆژا کوردان واتەدارە. ژ بەر ڤێ یەکێ دێ ھەڤدیتنێن مە بەردەوام بکەن. ژ بۆ مەزنترکرنا ڤێ ھەڤپەیمانیێ ئەم دێ ھەول بدەین و بەرپرسیاریێن خوە ب جهــ بینین.''

کـــاروان بــــاعەدری