كۆنسووڵی وڵاتانی بیانی و هەزاران كەس سەردانی مەزاری نەمرانیان كرد

بارزان-KDP.info- لە ماوەی دوو ڕۆژی ڕابردوودا، كۆنسووڵی گشتیی وڵاتانی بیانی لە هەولێر و هەزاران كەسی خەڵكی كوردستان لە شار و شارۆچكەكانەوە سەردانی مەزاری نەمرانیان لە بارزان كرد، دوای پێشوازیكردنیشیان لە لایەن نوێنەری سەرۆك بارزانییەوە، تاجەگوڵینەیان لەسەر مەزاری نەمران دانا.

كۆنسووڵی گشتیی وڵاتانی ژاپۆن، چین، هیندستان، بولگاریا، هەنگاریا، فەڵەستین، سوید، پۆڵۆنیا، سریلانكا، ڕووسیا و كۆریای باشوور لە هەولێر، سەردانی مەزاری نەمرانیان لە بارزان كرد و، باسیان لە خەبات و تێكۆشانی بارزانیی نەمر كرد، كە بە درێژاییی تەمەنی خۆی، خەباتی كردووە بۆ ئەوەی گەلەكەی بە ئازادانە بژی و بە مافە ڕەواكانی بگات.

لە لایەكی دیكەوە، كارمەندانی كوالیتیی كۆنتڕۆڵی دەرمان، سەردانی مەزاری نەمرانیان لە بارزان كرد، هەروەها هەزاران هاووڵاتی لە شار و شارۆچكەكانی كوردستانەوە لە ماوەی ئەو دوو ڕۆژەدا سەردانی مەزاری نەمرانیان لە بارزان كردووە و، دوای دانانی تاجەگوڵینەش، بەڵێن و پەیمانیان بۆ ڕێبازی بارزانی و پارتی دووپات كردەوە، كە بەردەوام دەبن لەسەر ئەو ڕێبازە پیرۆزە.

ڕابین شێروانی