هەڵگورد حیکمەت: تا مانگی دابێ بایۆمەتریی وەزارەتی پێشمەرگە تەواو دەکرێت
هەولێر-KDP.info- بەڕێوەبەری ڕاگەیاندنی وەزارەتی پێشمەرگەی حکوومەتی ھەرێمی کوردستان دەڵێ، تۆمارکردنی ناوەکان لە پرۆسەی بایۆمەتریدا لە وەزارەتی پێشمەرگە بەردەوامە و بڕیارە تا کۆتاییی مانگی دابێ ھەموو ھێزەکانی پێشمەرگە ناوی خۆیان تۆمار بکەن.
بەڕێوەبەری ڕاگەیاندنی وەزارەتی پێشمەرگەی حکوومەتی ھەرێمی کوردستان، (عەمید ھەڵگورد حیکمەت) بە ماڵپەڕی فەرمیی پارتی دیموکراتی کوردستانی ڕاگەیاند: ''نیزیکەی ٢٠ ڕۆژ دەبێت تۆمارکردنی ناوەکان بۆ پرۆسەی بایۆمەتری لە وەزارەتی پێشمەرگە دەستی پێ کردووە و تا ئێستا دیوانی وەزارەتی پێشمەرگە تەواو بووە.''
(عەمید ھەڵگورد حیکمەت) گوتی: ''ئەو پرۆسەیە بەبێ جیاوازی ھەموو ھێزەکانی پێشمەرگە، بە یەکەکانی ٧٠ و٨٠شەوە دەگرێتەوە.''
بەڕێوەبەری ڕاگەیاندنی وەزارەتی پێشمەرگەی حکومەتی ھەرێمی کوردستان ڕوونی کردەوە: ''بڕیار دراوە لیژنە دروست بکرێت بۆ ئەوەی ھێزەکانی یەکەکانی ٧٠ و٨٠ لە پرۆسەی بایۆمەتریدا دەست بە تۆمارکردنی ناوەکانیان بکەن.''
(حیکمەت) دەشڵێ: ''بڕیارە تاکو مانگی دابێ ھەموو هێزەکانی وەزارەتی پێشمەرگە ناوی خۆیان لە پرۆسەی بایۆمەتریدا تۆمار بکەن و کۆتایی پێ بێت.''
بڵند ئیبراھیم
