وەزیری دەرەوەی سێ وڵات گەیشتنە هەولێر
هه‌ولێر-KDP.info- وەزیرانی دەرەوەی هۆڵەندا، بەلجیکا و لۆکسەمبۆرگ گەیشتنە هەولێر، (نێچیرڤان بارزانی) سەرۆكوەزیرانی هەرێمی كوردستان پێشوازیی لێكردن.
دوای سەردانەكەیان بۆ بەغدا، وەزیرانی دەرەوەی هۆڵەندا، بەلجیکا و لۆکسەمبۆرگ گەیشتنە هەولێر و لە فڕگەی نێودەوڵەتیی هەولێر لەلایەن (نێچیرڤان بارزانی) سەرۆكوەزیرانی هه‌رێمی كوردستانه‌وه پێشوازییان لێ كرا.
(بێرت کۆندرس) وەزیری دەرەوەی هۆڵەندا، (دیدیە ریندەرز) وەزیری دەرەوەی بەلجیکا و (جان ئەسیلبۆرن) وەزیری دەرەوەی لۆکسەمبۆرگ، سبه‌ینێ دووشەممە 19-12-2016 لەگەڵ بەرپرسانی هەرێمی كوردستاندا كۆ ده‌بنەوە.
بڕیار وایه سەردانی ئەو بنكانەی مەشق و ڕاهێنان بكەن كە لەلایەن وڵاتانی نێو هاوپەیمانیی نێودەوڵەتیی دژی داعشەوە بۆ مەشق و ڕاهێنان كردن بە هێزی پێشمەرگە، لە هەرێمی كوردستان كراونەتەوە.
وه‌ك زانراوه، ئۆپەراسیۆنی کۆنترۆڵکردنەوەی مووسڵ، شەڕی دژی داعش و چۆنیێتیی پێشكەشكردنی هاوكاریی بە ئاوارەكان، تەوەری سەرەکی کۆبوونەوەكانیان دەبێت لەگەڵ بەرپرسانی هەرێمی كوردستان.
