نێچیرڤان بارزانی لەگەڵ به‌رپرسانی توركیادا، پرسی ئاشتی و دەستگیرکردنی هاوسەرۆکانی هەدەپە باس دەکات
هه‌ولێر-KDP.info- به گوێره‌ی زانیارییه‌كانی مێدیای تورکیا ته‌وه‌رێكی سه‌ره‌كیی گفتوگۆكانی سه‌رۆكی حكوومه‌تی هه‌رێمی كوردستان لهگهڵ به‌رپرسانی باڵای توركیادا، پرسی ئاشتی و دەستگیرکردنی پەرلەمانتاران و هاوسەرۆکانی هەدەپەیە کە بە قسەی میدیاکانی تورکیا لە کۆبوونەوەکاندا قسەی لەبارەوە دەکرێت و چاوەڕی دەکرێت سەرۆکوەزیرانی هەرێمی کوردستان داوای پێداچوونەوە بە هەڵوێستی بەرپرسانی تورکیا بکات لەسەر ئەو پرسانە.
(نێچیرڤان بارزانی) سه‌رۆكی حكوومه‌تی هه‌رێمی كوردستان شەوی ڕابردوو گه‌یشتووه‌ته ئانکارای پایته‌ختی توركیا و دیدار و كۆبوونه‌وه‌كانی لهگهڵ به‌رپرسانی ئه‌و وڵاته‌دا ده‌ست پێ کردووە و لە ئێستادا لهگهڵ (بینالی یڵدرم) سه‌رۆكوه‌زیرانی توركیادا لە كۆبوونه‌وه‌دان.
بەگوێرەی زانیارییەکان سەعات 13:30 به كاتی ئیستانبووڵ سه‌رۆكی حكوومه‌تی هه‌رێمی كوردستان لهگهڵ (ره‌جه‌ب ته‌ییب ئه‌ردۆغان) سه‌رۆككۆماری توركیادا کۆ دەبێتەوە و په‌یوه‌ندییه‌كانی نێوان هه‌ر دوولا و بارودۆخی ناوچه‌كه به تایبه‌تی پرسی سیاسی و ئابووری و جه‌نگ له دژی داعش دەخەنە بەر باسەوە.
