ئەنجوومەنی وەزیرانی ھەرێم لەبارەی چەند پرسێكەوە كۆ دەبێتەوە
ھەولێر-KDP.info- وەزیری كار و كاروباری كۆمەڵایەتیی حكوومەتی ھەرێمی كوردستان ڕایگەیاند، بڕیارە ئەمڕۆ ئەنجوومەنی وەزیران كۆ ببێتەوە و تێیدا گفتوگۆ لەبارەی چەند بڕگەیەك دەكات، لەوانە وەزارەتی دارایی باسی ئامادەكاری بۆ دابەشكردنی مووچەی مانگی نۆ دەكات.
(محەممەد ھاودیانی)، بە ماڵپەری فەرمیی پارتی دیموكراتی كوردستانی راگەیاند: "كۆبوونەوەی ئەمڕۆ چەند بڕگەیەك لەخۆ دەگرێت، لەوانە وەزارەتی دارایی راپۆرتێك پێشكەش دەكات لەبارەی خەرجی و داھاتەكانی و ئامادەكاریی وەزارەت بۆ دابەشكردنی مووچەی مانگی نۆ".
(هاودیانی) گوتیشی: "خاڵێكی دیكەی كۆبوونەوەكە ئەوەیە، وەزیری ناوخۆ راپۆرتێك پێشكەش دەكات لەبارەی سەركەوتنەكانی ھێزی پێشمەرگە لە بەرەكانی جەنگ، ھاوكات وەزارەتی شارەوانی و گەشتوگوزار لە راپۆرتێكدا تیشك دەخاتە سەر پێداویستیی وەزارەتەكەیان و، خاڵێكی دیكەیش ئەوەیە كە وەزارەتی كشتوكاڵ راپۆرتێك پێشكەشی ئەنجوومەنی وەزیران دەكات".
بڵند ئیبراھیم
