خوێندن له زانكۆی ڕاپەڕین ده‌ست پێ ده‌كاته‌وه
ڕانیە-KDP.info- گوتەبێژی زانكۆی ڕاپەڕین دەڵێ، لە پێناو بەرژەوەندیی گشتی و قوتابیان و بەفیڕۆنەچوونی ساڵێكی خوێندن، دەستیان كردووەتەوە بە خوێندنی ئەمساڵ، مامۆستایانیش بە شێوه‌ی یاسایی داوای مافی خۆیان دەكەن، بەڵام بایكۆتیان شكاندووە.
(ئاراس ڕەمەزان)، بە ماڵپەڕی فەرمیی پارتی دیموكراتی كوردستانی ڕاگەیاند: "لە زانكۆی ڕاپەڕین -ڕانیە، مامۆستایان بایكۆتیان شكاندووە و دەست دەكرێتەوە بە خوێندنی ساڵی (2016-2017)، ئه‌مه‌ش لە پێناو بەرژەوەندیی قوتابیان و بەفیڕۆنەچوونی ساڵێكی خوێندنیانه بایكۆتمان شكاندووە، بەڵام بایكۆتشكاندن ئەوە ناگەیەنێ كە داوای مافی خۆمان نەكەین، بەڵكو بەردەوامین لە داواكردنی مافەكانمان، وەلێ بە شێوەیەكی یاسایی".
دوێنێ زانكۆی ڕاپەڕین ڕاگەیێنراوێكی بڵاو كردەوە و داوای لە قوتابیان كرد بێن بۆ زانكۆ و دەست بكەنەوە بە خوێندن.
لە ڕاگەیێنراوەكەدا هاتبوو: "دوای ئەوەی سەرۆكایەتیی زانكۆی راپەڕین گفتوگۆی وردی لەگەڵ زۆرینەی ستافی وانەبێژی زانكۆ كرد، بە ھەماھەنگی لەگەڵ زانكۆكانی دیكەی سنوورەكە كە دەوام تیێیاندا وەستابوو، ھەروەھا بە لەبەرچاوگرتنی بەرژەوەندیی خوێندكاران و نەفەوتانی ساڵێكی خوێندنیان، بڕیاری دا كە رۆژی شەممەی داھاتوو یەكەم رۆژی دەستپێكی دەوامی خوێندن بێت، ھەروەھا لە رۆژی سێشەممەشەوە خوێندكاران دەتوانن سەردانی بەشەناوخۆییەكان بكەن بۆ وەرگرتنی بەشەناوخۆیی".
فایزە كۆیی
