دربۆ: سنووری شنگال بەتەواوەتی ئازاد دەکرێ و ئاوەدان دەکرێتەوە
شنگال-KDP.info- فەرماندەیەكی پێشمەرگە رایگەیاند، رێگەی سووریا زۆر قەلەبالغ بووە و رۆژانە تیرۆریستانی داعش هەڵدێن و ناوچەكە چۆڵ دەكەن، هەروەها ئەو ٥ كۆمەڵگەی لە شنگالدا ماون پلانی بۆ دانراوە و لە ماوەیەكی نزیكدا سنووری شنگال بە تەواوەتی ئازاد دەكرێت و ئاوەدان دەكرێتەوە.
(قاسم دربۆ) فەرماندەی پێشمەرگە لە شنگالدا بۆ ماڵپەڕی فەرمی پارتی دیموكراتی كوردستان گوتی: دوای دەست پێكردنی ئۆپەراسیۆنی ڕزگاركردنی شاری مووسڵ كە بۆ ماوەی ٢٠ رۆژە ئەو ئۆپەراسیۆنە دەستی پێ كردووە، رەوشی داعش لە دەوروبەری شنگال و ئەو كۆمەڵگانەی ماون زۆر تێكچووە و ڕێگەی سووریا زۆر قەرەباڵغ بووە و هەموویان بەرەو سووریا هەڵدێن.
گوتیشی: تەنیا ٥ كۆمەڵگە لە دەوروبەری شنگال ماون، ئێمە بۆ ئازادكردنی ئەو شوێنانە ئامادەین و ئامادەكاری كراوە و پلان دانراوە بۆ ئەوەی ئازاد بکرێنەوە.
دربۆ ئاماژەیشی دا، دوای ڕزگاركردنی شنگال خەڵك دەگەڕێتەوە سەر ماڵ و حاڵی خۆیان، لە زۆر شوێن قوتابخانە كراوەتەوە، دوای ئازاد كردنی ئەو ٥ كۆمەڵگەیە و گەیاندنی كارەبا و ئاو و پڕۆژەی خزمەتگوزاری خەڵكی ناوچەكە بە تەواوەتی دەگەڕێنەوە، بۆیە چاوەڕوان دەكەین دوای ئازادكردنی ئەو ٥ كۆمەڵگەیە شنگال بە تەواوەتی ئاوەدان دەكرێتەوە و خەڵك دەگەڕێنەوە سەر ماڵ و حاڵی خۆیان و ناوچەكە ئاوەدان دەكرێتەوە".
رابین شێروانی
