پێشمەرگە دەروازەی مووسڵی لە ڕێسمە بردووە؛ داعش گەمارۆ دراوە
بەرەی جەنگ-KDP.info- فەرماندەیەکی هێزی پێشمەرگەی کوردستان ئاماژە بەوە دەکات هێزی پێشمەرگەی کوردستان دەروازەیەکی گەورەیان لە شاری مووسڵ کردووەتەوە و سوپای عێراقیش لە پێشڕەویدان بەرەو ناوشار.
لیوا بەهرام دۆسکی، فەرماندەی هێزی پێشمەرگە لە میحوەری باشیکەوە بە ماڵپەڕی فەرمیی پارتی دیموکراتیی کوردستانی ڕاگەیاند: "ئەرکی هێزی پێشمەرگەی کوردستان هێشتا تەواو نەبووە و، زۆر شوێنی دیکەش ماوە کە دەبێت داعشی لێ دەربکەن، بە تایبەت گوندەکانی دەوروبەری شاری مووسڵ کە بەرتاو (جێ‌نفووز)ـی کوردستانن."
دەیشڵێ: "داعشێکی زۆر بەرەو سووریا ڕایان‌کردووە و هێزی پێشمەرگەی کوردستان دەروازەیەکی مووسڵیان شکاندووە؛ ئەوەی ماوەتەوە سوپای عێراقە دەستوبرد بکەن و دزە بکەنە ناوشاری مووسڵەوە".
گوتیشی: "داعش دوو ڕێگایان هەیە؛ یان دەبێت بکوژرێن یان دەبێت ڕابکەن بەرەو سووریا چونکە پێشمەرگە لەم لاوە و سوپای عێراق لەو لاوە گەمارۆیان داون".
کارزان سەباح هەورامی
