فازڵ میرانی پێشوازیی لە فراکسیۆنی پارتی لە پەرلەمانی عێراق کرد

هەولێر-KDP.info-  فازڵ میرانی سکرتێری مەکتەبی سیاسیی پارتی دیموکراتی کوردستان پێشوازیی لە فراکسیۆنە پارتییەکەی پەرلەمانی عێراق کرد و دەستخۆشی لێ کردن کە پابەندی ڕاسپاردەکانی سەرکردایەتیی پارتینە لە بەغدادا.

 

ئەمڕۆ لە بارەگای مەكتەبی سیاسیدا بە سەرپەرشتیی فازڵ میرانی سکرتێری مەکتەبی سیاسیی پارتی، مەحموود محەمەد و عێزەدین بەرواری و ڕیبوار یەلدا ئەندامانی مەكتەبی سیاسی و، ڕەمزی شەعبان ئەندامی یەدەگی مەكتەبی سیاسی و، تەها بەرواری بەڕێوەبەری نووسینگەی جێگری سەرۆكی پارتی دیموكراتی كوردستان و خەسرەو گۆران سەرۆكی فراكسیۆنە پارتییەکەی پەرلەمانی عێراق و، ئەندامانی ئەو فراكسیۆنە کۆ بوونەوە.

 

فازڵ میرانی وێڕای بەخێرهێنانیان باسی ڕەوشی ئەمڕۆی عێراق و كوردستانی کرد و پێشڕەوییەکانی ئەم دواییەی پێشمەرگەی كوردستان لە بەرەكانی جەنگ دژی داعش بەرز نرخاند و سپاسی ڕۆڵی قارەمانانە و گیانفیداییەکەی پێشمەرگەی كوردستانیشی كرد.

 

ئینجا سكرتێری مەكتەبی سیاسی دەستخۆشی لە خۆڕاگری و پابەندبوونی ئەندامانی فراكسیۆنی پارتیی کرد لە جێبەجێ كردنی ڕاسپاردەكانی سەركردایەتیی حزب لە بەغدادا.

 

هەروەها فازڵ میرانی ئاماژەی بەوە دا كە: "ئەم قۆناغە زۆر ناسکە و ئێوەی پەرلەمانتار دەبێ وریاتر بن لە كارەكاندا و لەسەر بەرژەوەندییە بەرزەکان سازش نەکەن و ببنە دەنگی ڕاستەقینەی كورد لە پەرلەمانی عێراقدا."

 

 خەسرەو گۆران سەرۆكی فراكسیۆنە پارتییەکەی پەرلەمانی عێراق سپاسی مەكتەبی سیاسیی کرد بۆ ئەم پێشوازییە و ڕەخساندنی ئەم دەرفەتە بۆ كۆبوونەوە و باسی كارەكانی فراكسیۆنە پارتییەکەی پەرلەمانی بەغدای كرد, و ئاماژەی بەوە دا كە "ئێمەی فراكسیۆنی پارتی لە هەموو كارێکدا بەرژەوەندییەکانی گەلی كورد دەخەینە پێش گشت شتێکەوە و هەریز نەمانهێشتووە كە جیاوازییەكانی ناو هەرێم كار بكاتە سەر فراكسیۆنەکەی ئێمە و لە كارەكەماندا ڕەنگ بداتەوە."

 

لە ئاخرەوە دەرگای گفتوگۆ و پرسیار كرایەوە و، هەمووان ڕا و پێشنیاریان ئاڵوگۆڕ كرد.