پەیامی سەرۆكوه‌زیرانى كوردستان بۆ كۆچی دواییی شاعیری نێوداری كورد مامۆستا هێدی
هەولێر-KDP.info- نێچیرڤان بارزانی، سەرۆكوه‌زیرانى هەرێمی كوردستان بەبۆنەی كۆچی دواییی شاعیرى نێوداری كورد مامۆستا خالیدی حیسامی، ناسراو بە (هێدی) پەیامێكی ئاراستەی بنەماڵەی خوالێخۆشبوو، خەڵكی بۆكان و مەهاباد و هەموو گەلی كوردستان كرد و، خوالێخۆشبووى وەك ڕۆشنبیرێكی شۆڕشگێڕ و وەفاداری ئامانجەكانی شۆڕشی كوردستان و كوردایەتی ناساند.
ئەمەش دەقی پەیامەكەی بەڕێز نێچیرڤان بارزانی یه:
بەبۆنەی كۆچی دواییی شاعیر و نووسەری نێوداری كورد مامۆستا خالیدی حیسامی (هێدی)، سەرەخۆشی لە بنەماڵەی بەڕێزی مامۆستای خوالێخۆشبوو و خۆمان و هەموو گەلی كوردستان دەكەم و، لە خوای مەزن نزای بەهەشتی بۆ دەخوازین.
مامۆستا خالیدی حیسامی كە پێش ٨٩ ساڵ لە گوندی شێخاڵی نێوان هەردوو شاری بۆكان و مەهاباد لە بنەماڵەیەكی دیار لەدایك ببوو، كەسایەتی و شاعیرێكی جێگەی شانازیی خەڵكی خۆشەویستی بۆكان و مەهاباد بوو. مامۆستا خالیدی حیسامی لەگەڵ هەردوو شاعیر و ڕۆشنبیری نێودار هێمن و هەژاری موكریانی، سێكوچكەی ڕۆشنبیری و ئەدەبیاتی موكریانیان پێكهێنا و، كۆڵەگەیەكی بەرچاوی ڕۆشنبیری و ئەدەبی كوردیش بوون بەگشتی.
مامۆستای خوالێخۆشبوو خالیدی حیسامی، بەشدارییەكی بەرچاوی لە كۆماری كوردستان لە مەهاباد و شۆڕشی ئەیلوولدا كردبوو. شیعر و نووسینەكانی لە ڕۆژنامە و گۆڤارەكانی كۆماری كوردستان و هەروەهاش لە شۆڕشی ئەیلوول و، كاركردنی لە ڕادیۆی دەنگی كوردستانی عێراقدا، هەمیشە بۆ خۆی جێگەی شانازی بوون و، بۆ شۆڕشگێڕانی كوردستان و پێشمەرگەش مایەی ورەبەرزییەكی زۆر بوون.
مامۆستا خالیدی حیسامی، دوای نسكۆی شۆڕشی ئەیلوول و هەڵگیرسانەوەی شۆڕش، وەك شاعیرێكی شۆڕشگێڕ، جارێكی دیكە نزیك و تیكەڵاوی شۆڕش بوو، ئەو وەفادارییە و نزیكییەیشی وایكرد كە بتوانێت دەق و شاكاری شیعریی پڕ به‌هەست بۆ كۆچ و بیرەوەرییە ساڵانەكانی مەلا مستەفا بارزانی و ئیدریس بارزانی بنووسێت لەپێش ڕاپەڕین.
مامۆستا خالیدی حیسامی، بۆ ئێمە پێشمەرگە، ڕۆشنبیر و وەفادار و یادگارێكی پێشەوا قازی محەممەد و بارزانیی نەمر بوو.
مامۆستا خالیدی حیسامی، ویڕای شیعرە شۆڕشگێڕییە هەستهەژێنەكانی، غەزەلنووسێكی گەورە بوو، لەو بوارەشدا بە هەستی ناسك و جوانناسیی خۆی، جێگەیەكی دیاری لەناو ئەدەبی كوردیدا بۆ خۆی كردووەتەوە.
مامۆستا خالیدی حیسامی، بە خەبات و بەرهەمەكانی هەمیشە وەك كەسێكی خۆشەویستی گەلەكەی و وەفاداری ئامانجەكانی شۆڕشی كوردستان و كوردایەتی دەمینێتەوە. یادی بەخێر و ڕۆحی شاد بێت.
نێچیرڤان بارزانی
سەرۆك وه‌زیرانى هەرێمی كوردستان.
٢٨ى ئۆكتۆبه‌رى ٢٠١٦
