پەكەكە، لە بەردەم ئاوەدانكردنەوەی ٦٥ گونددا رێگرە

سۆران-KDP.info- لە سنووری مێرگەسۆر، پەكەكە بووەتە بەربەست لە بەردەم هاووڵاتیان بۆ ئەوەی نەتوانن گوندەكانیان ئاوەدان بكەنەوە.

 

(غەفوور مالەسواری)، قایمقامی شارۆچكەی مێرگەسۆر، بۆ ماڵپەڕی فەرمیی پارتی دیموكراتی كوردستان دەڵێ: "چەكدارانی پەكەكە دەستیان بەسەر زیاتر لە 65 گوندی سنووری مێرگەسۆردا گرتووە و، رێگە نادەن گوندنشینان بگەڕێنەوە بۆ سەر موڵك و ماڵی خۆیان".

 

(مالەسواری) گوتیشی: "بەو هۆیەوە ناوچەكە بەردەوام بووەتە ئامانجی فڕۆكە جەنگییەكانی وڵاتی توركیا، بێگومان ئەنجامی بۆردوومانەكەیش تەنیا زیانی بە گوندنشینان گەیاندووە، ئەگەر بنكە و بارەگاكانی پەكەكە لە ناوچەكە نەمێنن و توركیایش بۆردوومانی ناوچەكە نەكات، خەڵكی ناوچەكە دەگەڕێنەوە سەر ماڵ و حاڵی خۆیان".

 

ڕابین شێروانی