كاكەیی: ئەمجارە قوربانیی مین كەمتر بوو.. له باشیك ١٦٠مینمان هەڵگرتووەتەوە
باشیك-KDP.info- فەرماندەی تیمی هەڵگرتنەوەی مین لە وەزارەتی پێشمەرگە دەڵێت، لە میحوەری باشیك داعش مینێكی زۆری داناوە و، ئەوانیش بەردەوامن لە پاككردنەوەی ئەو ناوچەیە و تاوەكو ئێستا نزیكەی ١٦٠مینیان هەڵگرتووەتەوە.
لیوا (مەحموود كاكەیی)، بە ماڵپەری فەرمیی پارتی دیموكراتی كوردستانی راگەیاند: "پرۆسەی خاوێنكردنەوەی ئەو ناوچانەی لە میحوەری باشیك ئازاد كراون، لە مین بەردەوامە و هێشتا زۆر ماوە خاوێنی بكەینەوە، چونكە ناوچەكە فراوانە و ئێمەیش زیاتر لای پێشەوە خاوێن دەكەینەوە لەبەر هێزی پێشمەرگە، بۆ ئەوەی سەنگەرەكانی خۆیان لێ بدەن".
(كاكەیی) گوتیشی: "ئەمجارە داعش مینێكی زۆری داناوە و تاوەكو ئێستا لە میحوەری باشیك نزیكەی١٦٠مینمان هەڵگرتووەتەوە".
فەرماندەی تیمی هەڵگرتنەوەی مین ده‌شڵێت، ئەمجارە رێژەی قوربانیان بە مین لە میحوەری باشیك لە چاو جارانی پێشوو كەمتر بوو.
بڵند ئیبراهیم
