تونێلەکەی زاخۆ سەدا٩٥ـی تەواو بووە

زاخۆ-KDP.info-  قایمقامی شارۆچكەی زاخۆ ڕایگەیاند، پرۆژەی قومەش (تۆنێل)ـی زاخۆ سەدا٩٥ـی تەواو بووە و، بە تەواوبوونی ئەو قومەشە كێشەی هاتوچۆ چارەسەر دەبێ و ڕووداوی هاتوچۆیش كەم دەبێتەوە.

 

 بۆتان موحسێن قایمقامی شارۆچكەی زاخۆ بۆ ماڵپەڕی فەرمیی پارتی دیموكراتی كوردستانی گوت: "سەدا٩٥ـی قومەشی زاخۆ تەواو بووە، بەڵام كێشەمان لە دەرگە (مەدخەل) و دەرچە (مەخرەج) هەیە، كە ئەویش پارەیەكی زۆری دەوێت، بەو قەیرانەیە ئەو پارەیەیش نییە؛ لەبەر قەیرانی دارایی نەبووایە زۆر لەمێژ بوو تەواو بووبوو."

 

گوتیشی: "بە كردنەوەی قومەشەكە كێشەی هاتوچۆ لەو ناوچەیە چارەسەر دەبێت و، ڕووداوی هاتوچۆ كەم دەبێتەوە؛  هەروەها  ڕێگەكە كورت دەبێتەوە و هاووڵاتیان دەتوانن بە ئاسانی هاتوچۆ بكەن."

 

شایانی باسە ڕۆژی ١٢/٦/٢٠١٣ نێچیرڤان بارزانی سەرۆكوەزیرانی هەرێمی كوردستان بەردی بناغەی قومەشی زاخۆی دانا،  قومەشەكە، كۆمپانیای لیماكی توركیا دروستی دەکا و جووتسایدە و ٣٦٠٠ مەتر درێژە.

 

ڕابین شێروانی