ئەفەندی: ئەمڕۆ دەچینە ناو باشیك، ئەو داعشانه‌ی ماون یان دەستگیریان دەكه‌ین یان دەیانكوژین
باشیك-KDP.info- بەرپرسی میحوەری باشیك ڕایگەیاند، هێزی پێشمەرگە پلانەكەی خۆی بە تەواوی جێبەجێ كردووە و تەنیا لەناو باشیك ژمارەیەك خۆكوژی تێدا ماون، ئەوانیش ئەمڕۆ لەناو دەبردرێن.
(حەمید ئەفەندی)، بە ماڵپەری فەرمیی پارتی دیموكراتی كوردستانی راگەیاند: "هێزی پێشمەرگە لە ئۆپەراسیۆنی رزگاركردنی باشیك پلانەكەی وەك خۆی جێبەجێ كردووە و، لە ئێستادا باشیك كەوتووەتە دوای هێزی پێشمەرگە، بەڵام پێشمەرگە تائێستا نەچووەتە ناو باشیك و تەنیا ژمارەیەك خۆكوژی تێدان، ئەمڕۆیش پێشمەرگە دەچێتە ناو باشیك و ئەو خۆكوژانەیش دەستگیر دەكات یاخود دەیانكوژێت، چونكە گەمارۆ دراون و هیچ رێگەیەكیان بۆ دەربازبوون نییە".
(ئەفەندی) گوتیشی: "لەو شەڕەدا زیانی زۆر بە تیرۆریستانی داعش گەیێندراوە و ژمارەیەكی زۆریشیان لێ كوژراون".
بەرپرسی میحوەری باشیك ده‌شڵێ، ئەم قۆناغەمان تەواو كردووە و بۆ قۆناغی دیكەش چاوەڕێی فەرمانی (سەرۆك بارزانی) دەكەن و هەر چی فەرمانێك بكات، ئامادەی جێبەجێ كردنین.
بڵند ئیبراهیم
