ئەوانەی لە کەرکووکدا بوونە چاوساغی داعش، دەستگیر دەکرێن
کەرکووک-KDP.info- بەرپرسێکی ئەمنی لە شاری کەرکووک ئاماژە بەوە دەکات کە سەرجەم داعشەکانی ناو کەرکووک لەناو براون و ئێستاش هەڵمەتی گرتنی گومانلێکراوان دەستی پێکردووە.
مقەدەم تایەر فەقێ عەلی، لە ئاسایشی دۆمیزی پارتی دیموکراتی کوردستانەوە، بە ماڵپەڕی فەرمیی پارتی دیموکراتی کوردستانی ڕاگەیاند: "زیاد لە ٦٠ چەکداری داعش لە سنووری سەنتەری شاری کەرکووکدا کوژراون کە سەرجەمیان لەو چەند ڕۆژەدا هاتبوونەوە ناو شارەوە؛ ٤ داعش لە نزیک ئەنجومەنی سەرکردایەتیی پارتی دیموکراتی کوردستان لە کەرکووکدا کوژراون و دەیانیشیان لێ گیراوە."
دەیشڵێ: "بەشێکی زۆری تەرمی چەکدارانی داعش ڕەوانەی پزیشکی دادوەری کراوون و هەڵمەتی فراوان لە سەنتەری شار و دەرەوەی شار بۆ لەناوبردنی داعش دەستی پێکردووە".
گوتیشی: "داعش لە کەرکووکدا قەڵاچۆ کراوە؛ لە دەرەوەی شاریشدا هەڵمەتی فراوان هەبوو و ئەمڕۆ کۆتایی بە هەڵمەتە هێنراوە. ئێستا دەست کراوە بە دەستگیرکردن و لێکۆڵینەوە لەوانەی چاوساغییان بۆ داعش کردووە".
کارزان سەباح هەورامی
