سەرۆککۆماری عێراق پیرۆزبایی لە سەرۆک بارزانی دەکات
هەولێر-KDP.info- سەرۆککۆماری عێراق پەیامێکی پیرۆزبایی ئاراستەی سەرۆک بارزانی کرد بەبۆنەی ساڵیادی دامەزراندنی پارتی دیموکراتی کوردستان کە ئەمە دەقەکەیەتی:
براى بەڕێزم جەنابى سەرۆک مەسعوود بارزانی
بە بۆنەى ساڵڕۆژى دامەزراندنى پارتى دیموكراتى كوردستانى تێكۆشەرەوە ، گەرمترین پیرۆزبایى ئاراستەى ئێوەو لە رێگەى بەرێزیشتانەوە پیرۆزبایى لە ئەندامانى مەكتەبى سیاسیى و ئەنجومەنى سەركردایەتى و ئەندام و لایەنگرانى پارتى دەكەم و بە هیوام پارتییە خەباتگێرەكەتان هەردەم لە پێشكەوتن و سەركەوتن دا بێت لە پێناو پاراستنى دەستكەوتەكانى گەلەكەمان دا. ئەم یادە مێژوییە هاوكاتە لەگەڵ جەژنى لە دایكبوونیشتاندا ، بەم بۆنەیەوە پیرۆزبایى گەرمتان پێشكەش دەكەم ، كە لەگەڵ تەمەنى پارتیدا ئێوەش وەك تێكۆشەرو پێشمەرگەو سەركردەیەكى ژیر بەشداریى خەباتى پرشگندارى گەلەكەمانتان كردوە ڕۆڵى دیارو بەرچاوتان هەبووە، ئێستاش لەم قۆناغەدا ئەو رۆڵە لە هەردوو ئاستى كوردستان و عێراقیشدا درێژەى هەیە.
یادى دامەزراندنى پارتى دیموكراتى كوردستان لە قۆناغ و هەلومەرجێكى گرینگ و چارەنوس ساز و ناسكدایە كە روى كردۆتە وڵات و ناوچەكەمان، كە پێویستى بە هەوڵى جدیى و یەكخستنى هەوڵەكانى هەموانە بۆ مامەڵە كردن لەگەڵ یەك بەیەكى پێشهات و روداوەكاندا.
دڵنیام پارتى دیموكراتى كوردستان وەك هێزێكى گرینگ لە ئاست ئەم بارودۆخەدا بە گیانێ لێپرسراوانە مامەڵە دەكات بۆ تێپەڕاندنى قەیرانەكان، كە دیارە رۆڵى جەنابتان لەو چوارچێوەیەدا دیار و بەرچاوە لە پێناوى گەیاندنى ولاَتەكەمان بە كەنارێكى هێمن و ئارام و دابینكردنى عەدالەتى كۆمەلاَیەتى و خۆشگوزەرانیى بۆ كۆمەلاَنى خەڵك.
بۆ بەدیهێنانى ئەو ئامانجانەش، بە هێزكردن و قوڵكردنەوەى یەكڕیزى نیشتمانیى و تەبایى و برایەتیى لە نێوان رۆڵەكانى گەل و هێزە سیاسییەكان لە هەر كات گرنگترە ،كە ئاشتبونەوەى سیاسیى و كۆمەلاَیەتیى و چەسپاندنى بنەماكانى دیموكراسیى و پێكەوە ژیانى بەئاشتیى پێكهاتە جیاجیاكان لە ولاَتێكى دەستوریى فیدراڵیى دیموكراسیى فرەیى ئازاد دا زامن و دەستە بەر دەكات.
لە كۆتایى دا هیوادارم یادى دامەزراندنى پارتییە تێكۆشەرەكەتان دەرفەتێكى گرینگ بێت بۆ ئەوەى بە حیكمەتى جەنابتان هەموو كۆشش و هەوڵەكان بخرێنە گەر, لە پێناوى بەدیهێنانى تەواوى ئاوات ویستەكانى گەلەكەمان لە سەرتاسەرى ولاَت دا كە هەموان خەباتى بۆ دەكەین ...
هەر شاد و سەركەوتوو بن.
براتان
د.فوئاد مەعسوم
سەرۆككۆمار
