"سەرۆك بارزانی دامەزراوەكانی راسپاردووە لێكۆڵینەوە لە كەیسی كوشتنی گەنجەكەی دهۆكدا بكەن"
هەولێر-KDP.info- گوتەبێژی فەرمیی سەرۆكایەتیی هەرێمی كوردستان، لە لێدوانێكدا ڕایگەیاند، لە پێناو دۆزینەوەی بكوژان و تاوانبارانی گەنجەكەی دهۆكدا، (سەرۆك بارزانی) دامەزراوە پەیوەندارەكانی راسپاردووە بە خێرایی لێكۆڵینەوەی ورد لەو كەیسەدا بكەن و تاوانباران دەستگیر بكرێن و سزای یاسایی بدرێن.
ئەمەیش دەقەكەیەتی:
لەبارەی كەیسی كوشتنی رۆژنامەنووس (ودات حوسێن)، نووسینگەی بەڕێز سەرۆكی هەرێمی كوردستان، پەیوەندی بە (حوسێن عەلی كۆچەر) باوكی (ودات حوسێن) كرد و سەرەخۆشی و هاوخەمیی (سەرۆك بارزانی) بە خانەوادەكەیان ڕاگەیەنرا و دڵنیای كردنەوە كە مومكین نییە تاوانێكی وا ون بێ و مافیان بفەوتێ و پێویستە بە زووترین كات تاوانباران بدۆزرێنەوە و سزای یاسایی خۆیان وەربگرن.
لە پێناو دۆزینەوەی بكوژان و تاوانباراندا، (سەرۆك بارزانی) دامەزراوە پەیوەندارەكانی راسپاردووە بە خێرایی لێكۆڵینەوەی ورد لەو كەیسەدا بكەن و تاوانباران دەستگیر بكرێن و سزای یاسایی بدرێن.
د. ئومێد سەباح
گوتەبێژی سەرۆكایەتیی هەرێمی كوردستان
15ـی 8ـی 2016
