''هیچ نوێنەرایەتییەک داناخرێت..ناسنامەى حزبى نوێنەر پەیوەندى بە بودجەى نوێنەرایەتى نییە''

هەولێر -KDP.info-  ئەو ماوەیە لە ڕاگەیاندنەکانى هەرێمى کوردستانەوە لێدوان و لێکدانەوەى جۆراوجۆر بڵاو کرایەوە گوایە لەبەر بێ‌بوودجەیی، حکوومەتى هەرێمى کوردستان چەند نوێنەرایەتییەکى خۆی لە دەرەوە دادەخات؛ وا فەرمانگەى پەیوەندییەکانى دەرەوە لەم ڕوونکردنەویەدا جەخت لەسەر ئەم خاڵانەى لاى خوارەوە دەکاتەوە:

1. فەرمانگە بە پێى ئەو بڕە پارەیەى کە لە لایەن سەرۆکایەتیى ئەنجومەنى وەزیران و وەزارەتى داراییى هەرێمى کوردستان بۆى تەرخان دەکرێت، بەبێ جیاوازیکردن بڕە بودجەیەکی دیاریکراو بۆ هەموو نوێنەرایەتییەکانى حکوومەت دەنێرێت.

2. بە هیچ جۆرێک ناسنامەى سیاسى و حزبیى نوێنەر بابەتێک نییە لە پرسى ناردنى بوودجە بۆ نوێنەرایەتییەکان لە لایەن فەرمانگەوە و هەموو لایەک دڵنیا دەکەینەوە کە هەرگیز شتێکى لەو جۆرە نەبووە و نابێت.

3. هیچ یەکێک لە نوێنەرایەتیەکانى حکوومەتى هەرێم لە دەرەوە بودجەى ساڵى 2015ـى بە تەواوەتى بۆ نەنێردراوە؛ هۆیەکەیشى قەیرانى دارایی و نەبوونى نەختینەى پێویست بووە.

4. دیسان جەخت دەکەینەوە کە پرسى داخستنى هیچ نوێنەرایەتییەک لە بەرنامەدا نییە، بەڵکو خواستنى ڕێکخستنەوەى نوێنەرایەتییەکانى ئێستا و هەروەها کردنەوەى نوێنەرایەتیى دیکە هەیە لە دەرەوە، بە مەبەستى پەرەپێدانى پەیوەندییەکانى حکوومەتى هەرێمى کوردستان لەگەڵ کۆمەڵگەى نێودەوڵەتیدا.

5. فەرمانگەى پەیوەندییەکانى دەرەوە لە ڕوانگەى بەرپرسیارەتییەوە و وەک ئەرکێکى پیشەیى، لەگەڵ لایەنە پەیوەندیدارەکان لە حکوومەتى هەرێمدا، لە هەوڵى زۆر جیدى و بەردەوامدایە بە گوێرەی بارى دارایی ئێستاى حکوومەت و کارى نوێنەرایەتییەکانى حکوومەت لە دەرەوە، هەرچۆنێک بووبێت بودجەى نوێنەرایەتییەکانى حکوومەتى هەرێم لە دەرەوە دابین بکات.

جا با هەموو دامەزراوەکانى ڕاگەیاندن و لێکۆڵەرەوان و شیکەرەوانى بوارە جیاجیاکان، ئەو خاڵانەى سەرەوە بە هەند وەربگرن و هەر باسێکى تر لە دەرەوەى ئەو خاڵانە بکرێت، هیچ سەرچاوە و بنەمایەکى ڕاستى نییە و تەنها بۆ شێواندنى ڕاستییەکانە.