سەرۆكایەتیی هەرێمی كوردستان سەرەخۆشی لە كەسوكاری منداڵەسووتاوەكانی نەخۆشخانەی یەرموكی بەغدا دەكات

هەولێر-KDP.info-  لە پەیامێکیدا، سەرۆكایەتیی هەرێمی كوردستان سەرەخۆشی لە كەسوكاری منداڵەسووتاوەكانی نەخۆشخانەی یەرموكی بەغدا دەكات و ڕایدەگەیێنێ، گیانلەدەستدانی منداڵانی ساوا بەمشێوەیە ڕووداوێكی زۆر دڵتەزێن و خەمناكە. ئومێدی ئەوە دەخوازین چیتر كارەساتی لەمجۆرە دووبارە نەبێتەوە و ژیانی منداڵان لە هەر شوێنێك بن پارێزراو بێت.

دەقی پەیامەکە:

ڕۆژی چوارشەممە 10ـی 8ـی 2016 لە ئەنجامی ڕووداوێكی ئاگركەوتنەوە لە بەشی ژنانی نەخۆشخانەی یەرموكی شاری بەغدا ژمارەیەكی زۆری منداڵی ساوا سووتان و گیانیان لەدەست دا. گیانلەدەستدانی منداڵانی ساوا بەمشێوەیە ڕووداوێكی زۆر دڵتەزێن و خەمناكە. لێرەدا سەرەخۆشی خۆمان بۆ كەسوكاری منداڵانە گیانلەدەستداوەكانی نەخۆشخانەی یەرموكی شاری بەغدا ڕادەگەیێنین و هاوبەشی خەمیانین و هیوای چاكبوونەوە بۆ برینداران دەخوازین. ئومێدی ئەوە دەخوازین چیتر كارەساتی لەمجۆرە دووبارە نەبێتەوە و ژیانی منداڵان لە هەر شوێنێك بن پارێزراو بێت.

سەرۆكایەتیی هەرێمی كوردستان

10ـی 8ـی 2016