گۆڕانكاری لە سیستەمی وەرگرتنی قوتابیاندا كراوە.. زانكۆكان سەرپشك دەبن
هەولێر-KDP.info- سەرۆكی زانكۆی پۆلیتەكنیكیی هەولێر دەڵێ، سیستەمی وەرگرتنی قوتابیان هەر لە سەرەتاوە لە كوردستان و عێراق بە شێوەی وەرگرتنی ناوەندی بووە، بەڵام ئێستا گۆڕانكاریێك لەمەدا كراوە كە بە رێژەی 20%ـە و پێی دەگوترێت وەرگرتنی زانكۆیی كە بە راستەوخۆ لە كۆلێژ چاوپێًكەوتن لەگەڵ قوتابیان دەكرێت و زانكۆكان سەرپشك دەبن چەند قوتابی وەردەگرن.
دكتۆر (كاوە شێروانی)، بە ماڵپەڕی فەرمیی پارتی دیموكراتی كوردستانی ڕاگەیاند: "سیستەمی وەرگرتنی قوتابیان بە
چاوپێكەتن لایەنی باش و خراپی هەیە، ئەمساڵیش وەكو تێست بەكار دێنین، ئەگەر سەركەوتوو بوو، بەردەوام دەبین و پەرەی پێ دەدەین، ئەم سیستەمەیش هەموو بەشەكان ناگرێتەوە و تەنیا 20%ـی زانكۆ و پەیمانگاكان دەگرێتەوە، بۆیە پێشبینی دەكەین سەركەوتوو بێت، قوتابییش ئازادە بە شێوەی وەرگرتنی زانكۆیی یان وەرگرتنی ناوەندی بەشدار بێ.
(شێروانی) گوتیشی: "تاقیكردنەوەكە دوو بەشە، یەكەمیان %60 نمرەی پولی شەشە، بەشی دووەمیان بە شێوەی چاوپێكەوتنە كە %40 نمرەی لەسەرە، بەشی زۆری پرسیارەكانیش لەسەر حەز و خولیایە، بۆ نموونە ئەگەر لە بەشی راگەیاندن بێت تاچەند حەز و خولیای راگەیاندنە، یان ئەگەر بەشەكە ئینگلیزی بێت تا چەند لە ئامادەیی حەزی لە ئینگلیزی بووە و هەر قوتابیێكیش كەمێك ئینگلیزی بزانێ دەرفەتی وەرگرتنی زیاتر دەبێ، كەلە لایەن لیژنەیەكی زانستییەوە پرسیارەكان دادەنرێن".
سەرۆكی زانكۆی پۆلیتەكنیكی هەولێر دەشڵێت: "لەبەر ئەوەی كۆلێژی پزیشكی و ئەندازیاری و یاسا زیاتر خواستیان لەسەرە لە لایەن قوتابیانی خۆمانەوە، بە نمرەی بەرزیش وەردەگیرێن. ئێمە ئەمساڵ ترسمان لەوە هەبوو لەوانەیە سەركەوتوو نەبین لەم سیستەمەدا، بۆیە نەخرانە چوارچێوەی ئەو سیستەمەوە و ئەم پرۆسەیەیش تاقیكردنەوەیە، لەبەر ئەوە نابێت كۆلێژێكی هەستیاری وەكو كولێژی پزیشكی بخەینە ناو پڕۆژەكەوە، سەرەڕای ئەوەیش ئەگەر سەركەوتوو بووین، بێگومان ساڵی دابێت ئەم كۆلێژانەش دەخەینە سەر ئەم سیستەمە".
نه‌دا مزووری
