شێخ شامۆ، پیاوانی ئایینی ئێزدی دەداتە بەر ڕەخنە.. لە خەم پاشەڕۆژی ئێزدیاندا نین

هەولێر-KDP.info-  نوێنەری كوردانی ئێزدی لە پەرلەمانی كوردستان ڕایدەگەیێنێت، پێویستە پیاوە ئایینییەكانی كوردانی ئێزدی، هاوشێوەی مەسیحییەكان پەیامێكی ڕوونیان هەبێت بۆ ئامۆژگاریكردنی كوردانی ئێزدی لەبارەی كۆچكردن و بەرگریكردن لە خاكی خۆیان و چوونەناو ریزەكانی پێشمەرگەوە، لەبەر ئەوەی پاشەڕۆژی كوردانی ئێزدی لەگەڵ هەرێمی كوردستاندایە.

(شێخ شامۆ)، بە ماڵپەری فەرمیی پارتی دیموكراتی كوردستانی راگەیاند: "باتریاركی هەردوو پێكهاتەی كلدانی و سریانی ئامۆژگاریی خەڵكی خۆیان دەكەن كە لەسەر خاكی خۆیان بمینێن و گرینگی بە پیرۆزیی خۆیان بدەن و وڵاتی خۆیان بەجێ نەهێڵن، داوایش لە (سەرۆك بارزانی) دەكەن ناوچەكانیان ئازاد بكرێن بە تایبەت پاتریاركی كلدانی باسی لەوە كردووە ئەگەر ئێوە دەتانەوێت بەرگری لە خاك و خۆتان بكەن، بچنە ناو هێزی پێشمەرگەوە و نەچنە ناو هێزە ناشەرعییەكانی عێراقەوە، هەڵبەتە ئەمە بەراورد بە پیاوە ئایینییەكانی كوردانی ئێزدی دەریدەخات، هیی ئێمە لاوازن و لە ئاست ئەو بەرپرسیارەتییەدا نین كە ئامۆژگاریی خەڵك بكەن".

(شێخ شامۆ) گوتیشی: "پێویست بوو میر و بابەشێخ و ئەنجوومەنی رۆحانی، ئامۆژگاریی خەڵكی بكەن كە لە بەرژەوەندیی ئەواندا بێت و پاشەڕۆژی باشیان هەبێت، لەبەر ئەوەی تاوەكو ئێستا پەیامیان لەبارەی كۆچكردنی كوردانی ئێزدییەوە ڕوون نییە و جورئەتی ئەوە ناكەن بەو خەڵكە بڵێن ئەگەر خاك و پیرۆزیی خۆتان جێ بهێڵن، دواڕۆژتان ڕوون نابێت".

دەشڵێت، پێویست بوو هاوشێوەی برا مەسیحییەكان پیاوە ئایینییەكانی ئێزدی بە ئەرك و بەرپرسیارەتیی خۆیان هەڵسن و پەیامی خۆیان بگەیێنن، بەڵام بەداخەوە نەیانتوانیوە ئەو كارە بكەن و لەجیاتی ئەوەی خەڵك ئامۆژگاری بكەن كۆچ نەكەن، پێش ئەوان كۆچ دەكەن.

نوێنەری كوردانی ئێزدی لە پەرلەمانی كوردستان ده‌شڵێت، ناكرێت بەو شێوەیە بێدەنگ بن و پێویستە پەیامیان هەبێت، بۆ نموونە ئەوانەی دەچنە نێو ریزەكانی پەكەكەوە ئایا چ پاشەڕۆژێكیان دەبێت و چ سوودێكی دەبێت، بەڵام گەر ئامۆژگاریان بكەن بچنە ناو ڕیزەكانی پێشمەرگە چاکترە و ڕاستترە، ئاخر پاشەڕۆژی ئێوە په‌یوه‌سته‌ بە هەرێمی كوردستانەوە، لەبەر ئەوەی ئەو پێكەوەژیانەی لە هەرێمی كوردستان هەیە، لە هیچ شوێنێكدا نییە.

بڵند ئیبراهیم