پەیامی سەرۆك بارزانی بە بۆنەی كۆچی دوایی خوالێخۆشبوو ئەحمەد چەلەبی

هه‌ولێر-KDP.info- (سه‌رۆك بارزانی) له‌په‌یامێكدا به‌بۆنه‌ی كۆچی دوای خوالێخۆشبوو (ئه‌حمه‌د چه‌له‌بی) رایده‌گه‌یه‌نیت كه‌ "لەدەست دانی كەسایەتییەكی مەزنی وەك ئەحمەد چەلەبی خەسارەتێكی گەورەیە بۆ گەلانی عێراق. خوالێخۆشبوو ئەحمەد چەلەبی دۆستێكی نزیكی شەخسی من و دۆستی گەلی كوردستان بوو و ڕۆڵی لە هەوڵدان بۆ بنیاتنانی دیموكراسی و دژایەتیكردنی دیكتاتۆری و زوڵم هەرگیز لە بیر ناكرێت."

ده‌قی په‌یامی سه‌رۆك بارزانی:

بەناوی خودای بەخشندە و میهرەبان
بە هەواڵی كۆچی دوایی سیاسەتمەدار و كەسایەتی تێكۆشەری عێراقی و سەرۆكی كۆنگرەی نیشتیمانی عێراق ئەحمەد چەلەبی زۆر خەمبار بووم. لەدەست دانی كەسایەتییەكی مەزنی وەك ئەحمەد چەلەبی خەسارەتێكی گەورەیە بۆ گەلانی عێراق. خوالێخۆشبوو ئەحمەد چەلەبی دۆستێكی نزیكی شەخسی من و دۆستی گەلی كوردستان بوو و ڕۆڵی لە هەوڵدان بۆ بنیاتنانی دیموكراسی و دژایەتیكردنی دیكتاتۆری و زوڵم هەرگیز لە بیر ناكرێت.

ئەو پەیوەندییە مێژووییەی كە خوالێخۆشبوو لەگەڵ گەلی كوردستاندا هەیبوو و پاڵپشتیكردنی لە مافە ڕەواكانی گەلی كوردستان هەمیشە لە یادمان دەمێنێتەوە و هەموو كات بە ڕێز و بەرزییەوە یادی خوالێخۆشبوو ئەحمەد چەلەبی دەكەینەوە.
بە لەدەستدانی زۆر خەمبارین و سەرەخۆشی و هاوخەمی خۆمان بە خانەوادە بەڕێزەكەیان و ئازادیخوازان و تەواوی گەلانی عێراق و كوردستان ڕادەگەیێنین.
انا لله و انا الیە راجعون
مه‌سعوود بارزانی
سەرۆكی هەرێمی كوردستان
3ـی 11ـی 2015