ڤیدیۆ؛ سەرۆک بارزانی بۆ دیلە ئازادکراوەکان: تیرۆریستان پاشه‌ڕۆژیان نییه.. ئازادكردنی ئێوه سه‌ركه‌وتنێكی گه‌وره بوو
هه‌ولێر-KDP.info- (مه‌سعوود بارزانی) سه‌رۆكی هه‌رێمی كوردستان له لەگەڵ دیلە ئازادکراوەکانی دەستی داعش کۆبۆوە كه لە ئۆپەراسیۆنەکەی رۆژی 22/10/2015 لە ناوچەی حەویجە ئازادکران و پێیڕاگه‌یاندن كه ئازادكردنی ئێوه سه‌ركه‌وتنێكی زۆر گه‌وره و كه‌موێنه‌یه..دڵنیاییشی كردنه‌وه كه تیرۆریستان هیچ ئاینده‌یه‌كیان نییه و له‌ناو ده‌چن.
ئه‌مڕۆ سێشه‌ممه 27/10/2015 (مه‌سعوود بارزانی) سه‌رۆكی هه‌رێمی كوردستان له لەگەڵ دیلە ئازادکراوەکانی دەستی داعش کۆبۆوە كه لە ئۆپەراسیۆنەکەی رۆژی 22/10/2015 لە ناوچەی حەویجە ئازادکران.
له دیدارەكە‌دا، كه (مه‌سروور بارزانی) راوێژكاری ئه‌نجوومه‌نی ئاسایشی هه‌رێمی كوردستان ئاماده‌ی بوو، (سه‌رۆك بارزانی) له وته‌یه‌كدا وێرای زۆر به گه‌رمی به خێرهاتنیان و پیرۆزبایی ئازادی وگەڕانەوەی ژیانی لە دیلە ئازادبووەکان کرد و خۆشحاڵیی خۆی نیشان دا کە تیمی دژه تیرۆری ئه‌نجوومه‌نی ئاسایشی هه‌رێمی كوردستان بە هاوکاریی هێزێکی تایبەتی ئەمریکا توانییان لە قوڵایی هێزی تیرۆریستاندا ئەو ئۆپەراسیۆنە سەرکەوتووە ئەنجام بدەن و ئەو دیلانە لە مەرگی حەتمی ڕزگار بکەن کە بەشی هەرە زۆریان لە لایەن تیرۆریستانەوە سزای مەرگیان بەسەردا سەپێندرابوو.
(سەرۆک بارزانی) ڕایگەیاند کە زانیارییمان هەبوو ژمارەیەکی زۆر دیل لەو شوێنە هەن و تیرۆریستان بڕیاری کوشتنی ئێوەیان دابوو، ئەگەرچی بەداخەوە ئەو برا پێشمەرگەکانەمان کە لەدەست تیرۆریستاندان لەو شوێنە نەمابوون، بەڵام ئازادکردنی ژیانی ئێوە سەرکەوتنێکی زۆر گەورە بوو و مایەی خۆشحاڵییە. سەرۆک بارزانی هەروەها ڕایگەیاند: لوتکەی خۆشحاڵیی مرۆڤ لەوەدایە کەسێک لە ناخۆشی ڕزگار بکات و خۆشحاڵی بکات. ژیانی مرۆڤ گرانبەهایە و خۆشحاڵین کە ئەو هێزەی کوردستان توانی ژیانی ئێوە ڕزگار بکات.
سەرۆک بارزانی دەستخۆشیی لە تیمەکەی دژه تیرۆری ئه‌نجوومه‌نی ئاساییشی هه‌رێمی كوردستان و هێزە تایبەتییەکەی ئەمریکا کرد بۆ ئەنجامدانی ئەو ئۆپەراسیۆنە و ڕایگەیاند کە تاکە پاڵنەری ئەنجامدانی ئۆپەراسیۆنەکە کارێکی مرۆڤانە بوو و بڕیارەکەش ئەوە بوو کە هەر دیلێک لەوێ هەبێت ئازاد بکرێت.
سەرۆک بارزانی جارێکی دیکە سەرەخۆشیی لە خانەوادەی ئەو ئەفسەرە ئەمریکاییە کرد کە لە ئۆپەراسیۆنەکەدا لە پێناوی مرۆڤایەتی گیانی خۆی بەخت کرد.
سەرۆک بارزانی ڕاشیگەیاند کە ئازادکردنی ئێوە بەبێ ئەوەی هیچ زیانێکتان پێ بگات سەرکەوتنێکی زۆر گەورە و کەموێنەیە.
هەر لە دیدارەکەدا دیلە ئازادکراوەکان سوپاسی سەرۆک بارزانی و ئەنجوومەنی ئاساییشی هەرێمی کوردستانیان کرد کە ژیانی ئەوانیان ڕزگار کردووە و دوای ئازادکردنیشیان ئازادی و ئارامییان بۆ مسۆگەر کردوون و هیوایان خواست هەرچی زووتر تیرۆریستانی داعش لە ناوچەکانیان دەربکرێن و هاووڵاتیانی ئەو ناوچانە لەو ترس و ئازارە ڕزگاریان بێت.
لە وەڵامیشدا سەرۆک بارزانی دیلە ئازادکراوەکانی دڵنیا کردەوە کە مانەوەی ڕێکخراوی تیرۆریستیی داعش تەنیا پەیوەستی کاتە و تیرۆریستان هیچ ئایندەیەکیان نییە و لەناو دەچن و ئاشتی و سەقامگیری بۆ ناوچەکانتان دەگەڕێتەوە.
