سەرۆكایەتیی هەرێمی كوردستان كردەوە تیرۆریستییەكانی ئانكارای سه‌ركۆنه كرد
هه‌ولێر-KDP.info- وێرای نیه‌گه‌رانیی له ته‌قینه‌وه‌كانی ئه‌مڕۆی ئانكارای پایته‌ختی توركیا، سه‌رۆكایه‌تیی هه‌رێمی كوردستان هاوكات رایده‌گه‌یێنێ، ئەم كردەوە تیرۆریستییە لەكاتێكدایە كە ناوچەكە بە گشتی و وڵاتی توركیا بە قۆناغێكی هەستیاردا تێدەپەڕێت و، مەبەستی تیرۆریستان لەم كردەوە نامرۆڤانەیە دروستكردنی ئاژاوە و قووڵكردنی ناكۆكیی نێوان پێكهاتەكانی توركیا و تێكدانی ئاشتیی كۆمەڵایەتیی هاووڵاتیانە.
بەداخێكی زۆرەوە ڕۆژی شەممە 10ـی 10ـی 2015 لە ئەنجامی دوو تەقینەوەی تیرۆریستی لە میتینگێكی تایبەت بە پارتی ئاشتی و دیموكراسی لە شاری ئەنكارا دەیان هاووڵاتی شەهید بوون و ژمارەیەكی زۆریش بریندار بوون.
سەرەخۆشیی و هاوخەمیی خۆمان بۆ گەلانی توركیا و كەسوكاری قوربانیانی ڕووداوە تیرۆریستییەكەی ئەمڕۆی ئانكارا ڕادەگەیێنین و هیوای چاكبوونەوەیش بۆ برینداران دەخوازین لە هەمانكاتیشدا زۆر بە توندی ئیدانەی ئەو كردەوە قێزەوەن و ترسنۆكانەی تیرۆریستان دەكەین.
ئەم كردەوە تیرۆریستییە لەكاتێكدایە كە ناوچەكە بە گشتی و وڵاتی توركیا بە قۆناغێكی هەستیاردا تێدەپەڕێت و، مەبەستی تیرۆریستان لەم كردەوە نامرۆڤانەیە دروستكردنی ئاژاوە و قووڵكردنی ناكۆكیی نێوان پێكهاتەكانی توركیا و تێكدانی ئاشتیی كۆمەڵایەتیی هاووڵاتیانە.
تیرۆر هەڕەشەیەكی جیددییە لەسەر هەموو پێكهاتەیەك و تێكڕای مرۆڤایەتی و، پێویستە ڕووبەڕووبوونەوەی ئەم دیاردە ترسناكە ئەولەویەتی هەموو لایەك بێت.
سەرۆكایەتیی هەرێمی كوردستان
10ـی 10ـی 2015
