لە ٢٣ ساڵی رابردوودا ١٤ هەزار هاووڵاتی هەرێم بوونەتە قوربانیی مین و تەقەمەنی

هەولێر-KDP.info-  لە ساڵی 1991 تا كۆتایی ساڵی 2014 لە هەرێمی كوردستان زیاتر لە 14 هەزار و 500  هاووڵاتی  بەهۆی مین  و تەقەمەنی  گیانیان  لە دەست داوە و كەمئەندام بوون، تەنیا لە ساڵی رابردووشدا لە سنووری پارێزگای هەولێر 8 هاووڵاتی بەهۆی  مین و تەقەمەنی كەمئەندام بوونە و گیانیان لە دەستداوە.

بەرپرسی راگەیاندنی بەڕێوەبەرایەتی گشتیی كاروباری مینی هەولێر (زێبار خالید) بە ماڵپەڕی فەرمیی پارتیی دیموكراتی كوردستانب  گوت:"
  لە ساڵی 1991 تا ئەمڕۆ لە هەرێمی كوردستان زیاتر لە 14 هەزار و 500 هاووڵاتی بەر مین و تەقەمەنی كەوتوون، لەو ڕێژەیەدا 8 هەزار هاووڵاتی بریندار و كەمئەندام بوونە، زیاتر لە 6 هەزار هاووڵاتیش گیانیان لە دەست داوە، تەنیا لەساڵی رابردوویشدا لە سنووری پارێزگای هەولێر 8 كەس بەر مین و تەقەمەنی كەوتوونە، لەو ڕێژەیە 6 كەس بریندار بوونە و دوو كەسیش گیانیان لە دەست داوە. زۆربەی ڕووداوەكانیش لە دەڤەری سۆران بوون، بە هۆی ئەوەی  زۆرترین ناوچەی مینڕێژكراو لە سنووری پارێزگای هەولێر دەكەوێتە ئەو ناوچەیە".

(زێبار خالید) گوتیشی: لە ساڵی رابردوودا لە سنووری پارێزگای هەولێر 17 كێلگە لە مین و تەقەمەنی پاككراونەتەوە، هەروەها هەر لەو ماوەیەدا 2015 مینی جۆراوجۆر لەناو براون و 1712 مینیش پوچەڵكراونەتەوە.

بەرپرسی راگەیاندنی بەڕێوەبەرایەتی گشتیی كاروباری مین لە هەولێر ئاشكراشی كرد، پاككردنەوەی ئەو كێلگانە لە مین و تەقەمەنی و پاشماوەی جەنگ، بایەخ و گرینگی خۆیان هەیە، وێرایی ئەوەی كاریگەری و مەترسی لەسەر ژیانی هاووڵاتیانی كوردستان كەم  دەبێتەوە، لە هەمان كاتیشدا هاووڵاتیان دەتوانن لە داهاتوودا ئەو شوێنانە بە سەلامەتی بەكاربهێنن و سوودی لێوەربگرن.

رابین شێروانی